La cumissiun per la politica da segirezza dal Cussegl dals chantuns vul dapli e pli svelt daners per l'armada. Ella propona in fond temporar per pudair modernisar l'armada e per finanziar l'agid per reconstruir l'Ucraina. En tut propona la cumissiun per quest intent 15 milliardas francs – 10 milliardas per l'armada e 5 milliardas per l'Ucraina.
Sco proxim sto la cumissiun da finanzas dal Cussegl naziunal tractar la fatschenta. Silsuenter va la fatschenta en il parlament. Pervi dals deficits che la Confederaziun quinta da far ils proxims onns, avevan il Cussegl federal ed il parlament decis d'auzar pli plaun il budget da l'armada.
Alternativa da 4 milliardas
Quasi sco alternativa ha la cumissiun era acceptà ina moziun che vul augmentar il budget da l'armada per 4 milliardas francs – e formulà la finamira ch'il budget da l'armada duai cuntanscher 1% dal product naziunal brut enfin l'onn 2030.
La cumissiun propona plinavant da cumplettar il program d’armament da l’armada per l’onn current, per in credit d’impegn en l’autezza da 660 milliuns francs. Uschia duain ins pudair cumprar sistems da defensiun da l'aria.
In vi e nà
Tar il budget da l’armada datti dapi mais ina discussiun, quant svelt ch’il budget duai vegnir augmentà. L’onn 2022 aveva il parlament decidì d’augmentar las expensas da l’armada fin l’onn 2030 successivamain sin 1% dal product interiur brut – da 5,5 sin var 10 milliardas francs l’onn. Pervia dals deficits che smanatschan ils proxims onns, ha il Cussegl federal dentant proponì che las expensas da l’armada duain cuntanscher pir l’onn 2035 questa finamira dad 1% dal BIP. Il parlament è suandà la proposta dal Cussegl federal.
Era tar l'agid per la reconstrucziun en l'Ucraina datti discussiuns co finanziar quella. Il Cussegl federal ha decidì 5 milliardas francs enfin il 2036. Ina part da quests daners duai vegnir finanziada or dal budget per la collavuraziun internaziunala. La sanestra è gia s'exprimida cunter quests plans.
La Tagesschau da SRF ha era rapportà: