Il Cussegl federal vul investir ils proxims onns maximalmain 26 milliardas francs en l'armada. Quai resulta da la missiva da l'armada ch'il Cussegl federal ha deliberà. Il Cussegl federal vul far ina dumonda correspundenta al parlament per ils onns 2025 fin 2028. El vul ultra da quai metter a disposiziun 4,9 milliardas francs per cumprar aifer quatter onns material per l'armada, per il program d'armament 2024 e per il program d'immobiglias dal departament da defensiun 2024. Da questas bunamain 5 milliardas francs vul il Cussegl federal 3,52 milliardas francs per material per l'armada.
Armada betg insolventa
Sco quai che la cussegliera federala Viola Amherd ha ditg a chaschun da la conferenza da pressa, na saja l'armada betg insolventa. L'armada n'haja betg surpassà il rom d'expensas,
Plinavant ha accentuà Amherd che l'armada n'haja betg empustà dapli material che quai ch'ella pudess pajar.
La situaziun finanziala da l'armada na saja betg extraordinaria. Credits d'obligaziun dettian la pussaivladad a l'armada da concluder contracts. I na dettia naginas rusnas finanzialas tar l'armada, perquai ch'ils contracts correspundents na sajan anc betg serrads giu.
Retschertgas da SRF han da curt mussà ch'i manca a l'armada svizra almain ina mesa milliarda francs per pudair pajar material empustà.
