L'armada n'ha nagin problem da finanziaziun, mabain in problem da communicaziun. A questa conclusiun vegn la cumissiun da finanzas dal Cussegl naziunal suenter in'audiziun cun la ministra da defensiun Viola Amherd. En spezial il schef da l'armada haja fatg decleraziuns «betg correctas».
Cumenzà cun rapport da SRF
SRF aveva rapportà la fin da schaner d’in document intern da l’administraziun, tenor il qual mancan a l’armada svizra fin la fin da l’onn 2025 1,4 milliardas francs per pajar cumpras d’armament gia fatgas. Il schef da l’armada Thomas Süssli ha relativà il di suenter la situaziun da partenza: L’armada n’haja betg ina fora da milliardas, ma ina stretga da liquiditad.
Quest'emna è la presidenta da la Confederaziun, Viola Amherd, s'exprimida per l'emprima giada pli ditg davart quest tema. En quest connex ha ella cuntraditg en intgins puncts al schef da l'armada. Uschia saja la preschentaziun tenor la quala l'armada na possia betg pajar quints faussa.
Cumissiun da finanzas ha tractà il dossier
Suenter la cumissiun per la politica da segirezza dal Cussegl dals chantuns è uss era la cumissiun da finanzas dal Cussegl naziunal sa fatschentada cun il dossier da l'armada. Amherd, Süssli ed ulteriurs represchentants da las autoritads responsablas èn vegnids consultads da la cumissiun.
«Oz è vegnì infurmà cun gronda transparenza ed avertadad», ha ditg la presidenta da la cumissiun Sarah Wyss (PS) a las medias. Tut las dumondas avertas sajan scleridas. La cumissiun da finanzas na vegnia betg a far ulteriurs pass. Dentant saja vegnì fatg «cleramain cler» al VBS che la communicaziun enturn il tema saja stada mala. «Igl èn capitads sbagls», ha Wyss ditg. La ministra da defensiun Amherd saja conscienta «ch’insatge uschia na dastga betg sa repeter».
Nauscha communicaziun
Las mancanzas da communicaziun èn d'attribuir en spezial al schef da l'armada Süssli che discurriva il di suenter la retschertga da SRF davant las medias pliras giadas d'ina stretga da liquiditad. Er en il document da l'armada che SRF ha cità è vegnì discurrì d'ina stretga da liquiditad. Tenor Wyss sajan las decleranzas stadas «betg correctas».
I saja vegnì tar malchapientschas communicativas ch'ins n'haja betg pudì rumir ord via, ha Wyss ditg. Ussa saja la situaziun dentant clera: «Tar l'armada n'exista nagina fora finanziala, ed i na dat era nagina stretga da liquiditad.» Puncto politica da finanzas saja «tut en urden» e «tut correct».
En il rom dal preventiv
Tenor decleraziuns dad Amherd envers la cumissiun da finanzas po l’armada ademplir tuttas obligaziuns ch’ella ha survegnì tenor contract. Perquai ch’il parlament haja extendì l’augment da las finanzas da l’armada sin 1% dal product naziunal brut (BIP) da 2030 sin l’onn 2035 dovria quai dentant «midadas da planisaziun», ha Wyss exprimì. Tractativas cun ils furniturs stoppian vegnir manadas da nov e projects priorisads da nov.
«Il VBS ha dentant fatg cler e net ch’el sa chattia en il rom dal preventiv», ha Wyss ditg. Questas infurmaziuns dal ministeri da defensiun sajan vegnidas percepidas da la cumissiun da finanzas sco «transparentas, crediblas e vardaivlas».
Dossier terminà
Sch'ins veglia metter a disposiziun dapli daners a l'armada per ch'ins possia stuppar las largias d'abilitad, saja ina decisiun politica, ha ditg Wyss. Sur da quella n'haja la cumissiun da finanzas betg discutà. I saja chaussa da las cumissiuns da la politica da segirtad da decider en chaussa.
Wyss ha deplorà davant las medias che la nauscha communicaziun da l’armada haja procurà per malruaus. Il dossier saja dentant terminà per sia cumissiun per il mument.
