La regulaziun svizra da «Too big to Fail» n’è betg senz’auter adattada per liquidar ina banca che saja globalmain activa e relevanta per il sistem. En la pratica fissan ils donns economics considerabels. Quai ha ditg la ministra da finanzas Karin Keller-Sutter en in’intervista cun la «Neue Zürcher Zeitung».
Er sch’ina liquidaziun fiss giuridicamain stada pussaivla, na fissi cleramain betg stà il dretg mument per experiments tar la surpigliada da la Credit Suisse tras la UBS. En pli ha Keller-Sutter suttastritgà ch’i na saja betg vegnì fatg squitsch sin la Svizra da l’exteriur en connex cun la decisiun da surpigliar la banca en crisa.
Er ha la ministra da finanzas refusà la pretensiun da separar la fatschenta svizra sco banca independenta. I fissi fitg ristgant da periclitar la surpigliada cun novas pretensiuns envers la UBS en quest stadi stadi da la transacziun – quai tant per l’economia svizra sco er per ils martgads da finanzas internaziunals.
