Al cumenzament dal cumbat vesevi or sco sch'il president da l'Uniun purila svizra Markus Ritter fiss il favurit. Uss dentant para il cusseglier guvernativ dal chantun Zug, Martin Pfister, d'avair gudagnà terren. En ils uschenumnads hearings han ils dus candidats da la partida Il Center empruvà da persvader las parlamentarias ed ils parlamentaris da las differentas francziuns.
- La Partida liberaldemocratica recumonda uschebain Markus Ritter sco era Martin Pfister.
- La gronda maioritad da la Partida populara svizra sustegna il president da l'Uniun purila svizra, Markus Ritter.
- Ils Verd-liberals na dattan betg ina recumandaziun. La fracziun ha dentant laschà sentir che sias simpatias sajan plitost da la vart dal cusseglier guvernativ da Zug, Martin Pfister.
- La Partida socialdemocratica na dat nagina recumandaziun per l'elecziun. Omadus candidats stettian politicamain memia dretg.
- La Fracziun verda n'ha betg decidì ina recumandaziun. Ils temas clima, ambient e biodiversitat sajan represchentads memia pauc en la regenza.
L'Assamblea federala plenara che consista dal Cussegl naziunal e dal Cussegl dals chantuns elegia in nov cusseglier federal per remplazzar Viola Amherd. Uffizialmain ha la partida Il Center nominà il cusseglier naziunal Markus Ritter ed il cusseglier guvernativ da Zug Martin Pfister.
Cun RTR essas Vus live da la partida al radio a partir da las 07:00 la damaun.
Parlamentarias e parlamentaris discrets
Las politicras ed ils politichers grischuns èn discrets sch'i va per la dumonda tgi ch'è il favurit per il sez en il Cussegl federal. Mintgin di ch’el haja in favurit, na vul dentant betg tradir quel. «L’elecziun d’in cusseglier federal è ina elecziun anonima. Jau tradesch betg tgi ch'jau elegel», di il cusseglier dals chantuns Martin Schmid. Era discret è il cusseglier naziunal Roman Hug. El di be: «Mesemna savain tgi ch’è la meglra elecziun per la Svizra.» La cussegliera naziunala Anna Giacometti ha decidì tgi ch'è ses favurit. Dentant na tradescha er ella betg tgi. Ella accentuescha dentant che Martin Pfister haja pudì gudagnar vuschs pli fitg che parlamentarias e parlamentarias hajan emprendì d'enconuscher el.
Speziala è l’elecziun dentant per Martin Candinas: «Per mai èsi ina elecziun speziala perquai che nus elegiain insatgi da mia partida, dentant betg perquai ch’jau valeva ina giada sco pussibel candidat.» Era Jon Pult guarda cun auters egls sin ina elecziun. Cun quai ch’el era l’ultima giada en la situaziun da Martin Pfister e Markus Ritter haja el ina chapientscha umana per ils dus candidats. Dentant era el na tradescha betg tge num ch’el vegn a scriver sin il cedel d’elecziun.
Tgi è Markus Ritter?
Markus Ritter n'è betg in nunenconuschent a Berna. L'um da 57 onns dal chantun da Son Gagl politisescha gia en la quarta legislatura en il Cussegl naziunal. El vegn savens titulà sco in dals pli pussants a Berna, or dal motiv ch'el è il president da l'Uniun purila svizra. Markus Ritter ha studegià inschignier d'economia e vegn descrit sco strateg, ina persuna ch'ins vul sin l'atgna vart e betg sco adversari.
Enfin avant dus onns ha Ritter manà ensemen cun sia dunna l'agen manaschi puril, ussa han ils figlis surpiglià il manaschi ad Altstätten. El è bab da trais figls. Forza prendia el da la cardientscha, Markus Ritter e sia dunna van regularmain en baselgia.
Tgi è Martin Pfister?
Martin Pfister è cusseglier guvernativ dal chantun Zug, el maina il departament da sanadad. Bunamain 10 onns è el gia en la regenza chantunala. Avant è el stà deputà en il parlament sco era president da la partida chantunala, da lez temp era quai anc la Partida cristiandemocratica. Emprendì ha l'um da 61 onns magister primar ed ha pli tard studegià germanistica ed istorgia.
Carriera ha Martin Pfister fatg en il militar – sco colonel. El è era stà schef da l'agid da catastrofas en la regiun territoriala 3 a la quala il Grischun fa era part. Sper la politica suna Martin Pfister posauna en ina gugga, fa però era gugent musica da jazz. El è maridà ed ha quatter uffants creschids.
Grischuns e Grischunas n'han betg vulì
Suenter la demissiun da Viola Amherd eran era divers nums grischuns stads en discussiun sco successiun. En emprima lingia quel dal cusseglier naziunal Martin Candinas. El sco er ulteriurs favurits han dentant desistì d'ina candidatura. La finala ha er il cusseglier guvernativ grischun Marcus Caduff fatg patratgs davart ina pussaivla candidatura e vegnida dumandada è era l'anteriura cussegliera guvernativa dal Grischun Barbara Janom Steiner. Lezza ha dentant ditg giu, cunquai che la dumonda era vegnida fitg a curta vista.