L'armada svizra na vegn betg a ruaus. Suenter la demissiun da la ministra da defensiun Viola Amherd han er il schef da l'armada Thomas Süssli ed il schef dal servetsch secret Christian Dussey inoltrà lur desditga. E sper ils problems en connex cun projects-clav da l'armada discutescha uss er in rapport da la controlla da finanzas davart in eventual fraud da milliuns en il manaschi d'armament Ruag il DDPS. Qua èn ils pli gronds plazzals da l’armada svizra.
Demissiuns: il persunal banduna la bartga
Il departament da defensiun perda entaifer curt temp ina part da ses top-persunal. L'entschatta schaner ha la cussegliera federala Viola Amherd inoltrà sia demissiun. Curt suenter ha il manader dal program dal project Air 2030, nua ch'i va per renovar l'aviatica militara, annunzià da midar en l'economia privata. Il cumandant da l'aviatica militara Peter Merz da sia vart daventa CEO da la controlla da traffic aviatic Skyguide.
Ussa suonda il proxim tagl cun las desditgas dal schef da l'armada Thomas Süssli e dal schef dal servetsch d'infurmaziun da la Confederaziun Christian Dussey. Il nov minister da defensiun – el vegn elegì ils 12 da mars – vegn a stuair prender spert decisiuns impurtantas davart il persunal. Tuttina na vesa Viola Amherd la situaziun da l'armada svizra betg uschè critic. Durant la conferenza da medias fa ella la dumonda, daco ch'i vegnia creà uschè in scenario da crisa. I sa tractia d'in «process usità» ed ins haja avunda temp per chattar successurs u successuras per ils posts vacants.
Er il schef da l'armada, Thomas Süssli, na vesa nagin problem tar la collavuraziun.
Tuttina tge che las gasettas pretendan: La collavuraziun cun la ministra da defensiun Viola Amherd è stada fitg buna.
Il schef da l'armada ha en ses pled tranter auter engrazia a la ministra da defensiun, Viola Amherd, e curregì las pretensiuns che sia demissiun pudess avair da far insatge cun la collavuraziun tranter ils dus.
Material per part antiquà
La defensiun cunter aviuns è dal tuttafatg antiquada per distanzas mesaunas. Bain ha il parlament empustà tar il cumprader d’armaziun Armasuisse en la procedura d’express novas rachetas per la defensiun cunter aviuns, che san er sajettar giu dronas. Ma anc ussa n’ha Armasuisse fatg nagina empustaziun ad in producent. Cura ch’in nov sistem vegn ad esser disponibel, resta avert. Empustà è il nov aviun da cumbat F-35, in’emprima furniziun duai arrivar il 2028. La situaziun da segirezza precara pudess dentant chaschunar retards.
Amherd davart l'affera Ruag
En la runda da dumondas ha la ministra da defensiun, Viola Amherd, prendì posiziun davart il scandal ch'è vegnì public il glindesdi, dus dis avant la conferenza da medias. Ins haja immediat pretendì che la Ruag examineschia la situaziun, respunda Viola Amherd sin la dumonda sch'ins haja reagì avunda sin las rinfatschas.
Per il mument avain sa fidà da las infurmaziun dals responsabels dal manaschi operativ.
Tenor la direcziun da la Ruag sa tractia be da pretensiuns d'in «burgais che fa quitads», ma las rinfatschas na constettian betg, declara Amherd. La decisiun da fidar a la direcziun da la Ruag possian ins dentant senz'auter metter en dumonda retrospectivamain.
I manca ina strategia
Durant ils ultims decennis ha l'armada adina adattà ils meds a la situaziun da smanatscha ed ha definì strategias correspundentas. Talas finamiras eran impurtantas per intermediar il senn dals custs per part immens. Cun la «armada 21» ha ella per exempel stgaffì meds finanzials l'onn 2004 cun reducir truppas. Ils daners han lura pudì fluir en novas tecnologias.
A partir da l'onn 2010 duevan vegnir realisadas meglieraziuns cun il «svilup da l'armada». Dapi lura è la situaziun geopolitica sa midada da princip – i manca dentant lingias directivas adequatas. En vista a las numerusas sfidas s’ha il departament da defensiun sfarlattà.
L'aviatica militara è flaivlentada
La modernisaziun dals sistems necessaris è fixada. Ils aviuns da cumbat dal tip F/A-18 che han 25 onns sa chattan en in program da mantegniment che ha stuì vegnir prolungà pervia da cumplicaziuns. Perquai èn dapi onns mo circa in tozzel dals 30 F/A-18 utilisabels. Era la surveglianza dal spazi d'aria è ina flaivlezza. In sistem ch'è adattà per il cas d'urgenza na progredescha strusch.
Debachel dals projects dad IT da l'armada
La Svizra sviluppa actualmain 22 projects-clav digitals. Nov da quels tutgan tar il departament da defensiun. Els custan 19 milliardas francs – e quasi nagut na va tenor plan. Central è in nov sistem operativ. La «nova plattafurma da digitalisaziun NDP» duai l’emprim cuvrir la strategia da guerra da l’armada en tut las spartas d’operaziun; sin terra, en l’aria, en il spazi, en il cyberspace, en il spazi electromagnetic ed en il spazi d’infurmaziun. La realisaziun è dentant mal en pe.
Er ulteriurs projects da clav dal VBS smanatschan da far naufragi tenor la delegaziun da finanzas, per exempel da remplazzar la telecommunicaziun mobila. Ina nova rait da direcziun da l'armada zoppegia suenter a l'urari.
Or da l'archiv: