RTR: Il davos mument è Barbara Janom Steiner vegnida contactada da la partida svizra che vuleva ch’ella candidescha per il Cussegl federal. Quai tuna in zic sco ina acziun da pumpiers?
Sara Hauschild: Gea, propi. Era sche Barbara Janom Steiner na vul betg prender posiziun publicamain, ha ella confermà envers RTR in rapport dal Sonntagsblick ch'aveva mussà che tut è ì piz a cup. Enfin ils 3 da favrer da mezdi han persunas interessadas pudì annunziar lur candidaturas. Anc la damaun da quest di, eran ils responsabels a Berna en tschertga dad ina dunna che pudess rinforzar il ticket cun Marcus Ritter e Martin Pfister. Pir en questa situaziun magari desperada han ils responsabels mess en discussiun il num da Barbara Janom Steiner.
Entaifer mo in’ura e mesa avess ella stuì decider sch’ella candidescha u betg. Impussibel per ella e n’era betg serius.
L’emprim han ils schefs da la partida chantunala empruvà da persvader ella e lura ha il president da la partida naziunala, Gerhard Pfister, persunalmain telefonà cun Barbara Janom Steiner. Entaifer mo in’ura e mesa avess ella stuì decider sch’ella candidescha u betg. Impussibel per ella e n’era betg serius, ha ella ditg envers RTR.
Avess ella candidà, sch’ella avess gì dapli temp?
Barbara Janom Steiner ha mo ditg ch’ella na possia betg dir definitivamain sch’ella avess candidà u betg, sch’ins avess contactà ella pli baud. Quai saja ussa ina dumonda era in zic ipotetica. Però tant ha ella fatg cler, en uschè ina situaziun dovri ina analisa profunda, ins stoppia metter sin la ballantscha ristgas e schanzas, i dovria ils discurs en la partida e natiralmain era cun la famiglia e per tut quai n’aveva ella betg pli temp.
- naschida il 1963 e creschida si a Scuol
- Furmaziun:
- studegà giura a l'Universitad da Turitg e fatg la patenta d'advocata en il Grischun
- ha fatg il Master of Business Administration (MBA) a l'Universitad da Son Gagl - 1995 – 2008: lavurà sco advocata independenta a Tavau e Cuira
- 2000 – 2007: presidenta da la PPS Grischun
- 2001 - 2008: stada commembra da la UBI, l'Autoritad independenta da recurs davart radio e televisiun
- 2003 – 2008: deputada en il Cussegl grond
- 2008 – 2018: cussegliera guvernativa dal Grischun (nov per la BDP Grischun ch'ha il 2021 fusiunà cun la CVP e daventà il Center)
- dapi il 2019: presidenta dal cussegl da la Banca naziunala svizra (commembra dapi il 2015)
- dapi il 2019: commembra da la Fundaziun Medias Rumantschas
Daco n’è ella betg stada pli baud sin il radar en quest entir process ?
Barbara Janom Steiner n'è dapi set onns betg pli en la regenza e dapi là e ella bler pli pauc preschenta publicamain. Ella è bain en differents cussegl d’administraziun e surtut è ella presidenta dal cussegl da la Banca naziunala svizra. Mo quai è in job discret, ins na prenda betg posiziun en connex cun ils process politics, la lavur succeda davos las culissas. Pia è ella ida in zic en emblidanza tar ils responsabels dal Center – però era tar nus schurnalistas e schurnalists.
In ulteriur motiv è ch’il Center Grischun era occupà ferm durant las ultimas emnas. Martin Candinas, in dals topfavurits per il post liber a Berna, ha surprendentamain ditg Na. Lura la proxima surpraisa, il cusseglier guvernativ Marcus Caduff ha communitgà ch’el vuless forza e lura na vuleva el tuttina betg.
Tut quai ed era las malsegirtads sin champ naziunal han sco i para fatschentà uschè ferm la partida ch’ins n’ha betg pensà ch’i dess era anc dunnas che pudessan ir en cursa.
Ed ussa è il tema cun quai evas u datti anc ina pussaivladad ch’ella pudess daventar cussegliera federala?
Da principi è il termin d’annunzia sperasvi, il ticket cun dus umens stat. Nus avain però tuttina dumandà il schef da fracziun a Berna, Philipp Matthias Bregy sch’i dess anc ina pussaivladad da metter sin il ticket ina terza persuna. El scriva che quai saja ina dumonda difficila che la fracziun avess lura da decider. Pussaivel pari, dentant pauc probabel.
Barbara Janom Steiner en mintga cas ha signalisà al telefon che questa pitschna episoda è cun quai evasa per ella.
Qua ha la partida manchentà ina gronda schanza.
Tge di tut quai davart la situaziun entaifer la partida?
Ina buna figura n’ha il Center betg fatg las davosas emnas – qua en il Grischun ed a Berna. Tut pareva caotic e pauc coordinà. La demissiun surprendenta da Viola Amherd, Gerhard Pfister, il favurit che na vul betg e lura x candidats e candidatas che han ditg Na e la partida chantunala ch’è sa concentrada ditg sin dus umens, Candinas e Caduff enstagl da metter sin maisa era il trumf Barbara Janom Steiner. Sco dunna cun 12 onns experientscha en la regenza grischuna, en pli era sco tenenta fiss ella stada ina candidata valabla. Qua ha la partida tenor mai, manchentà ina gronda schanza.