- En il segund scrutini ha Martin Pfister fatg la cursa encunter Markus Ritter. Uschia è la Svizra Centrala puspè represchentada en il Cussegl federal.
- Cunquai che ils auters commembers e commembras dal Cussegl federal na paran betg d'avair gust da midar departament vegn Martin Pfister probabel a surpigliar il Departament federal da defensiun, protecziun da la populaziun e sport, il qual è vacant suenter la demissiun da Viola Amherd.
- Grondas sfidas ed inqual plazzal spetga Martin Pfister. Ina elecziun da speronza, saja quella da Martin Pfister stada, quai di il correspundent da RTR en Chasa federala Adrian Camartin.
- Martin Pfister, 61 onns dal chantun Zug, politicher da la partida Il Center: el segua per il sez da Viola Amherd. Las ambiziuns en il Cussegl federal e co el vesa sia rolla datti da tadlar qua:
Themen in diesem Liveticker
- Quai èsi stà dal liveticker
- Rita Inderbitzin ch'abita a Guarda suna cun Martin Pfister
- In cusseglier federal da la Svizra Centrala
- Pli giuven e pli pauc feminin
- Markus Ritter: «Jau hai plaschair per Martin Pfister»
- Tge din las parlamentarias ed ils parlamentaris grischuns?
- Sfidas che spetga en il departament da defensiun
- Il nov cusseglier federal è vegnì saramentà
- Martin Pfister – quai è il nov commember da la regenza
- En il segund scrutini èsi gia cler
Situaziun da partenza avant las elecziuns
Al cumenzament dal cumbat vesevi or sco sch'il president da l'Uniun purila svizra Markus Ritter fiss il favurit. Uss dentant para il cusseglier guvernativ dal chantun Zug, Martin Pfister, d'avair gudagnà terren. En ils uschenumnads hearings han ils dus candidats da la partida Il Center empruvà da persvader las parlamentarias ed ils parlamentaris da las differentas fracziuns.
- La Partida liberaldemocratica recumonda uschebain Markus Ritter sco era Martin Pfister.
- La gronda maioritad da la Partida populara svizra sustegna il president da l'Uniun purila svizra, Markus Ritter.
- Ils Verd-liberals na dattan betg ina recumandaziun. La fracziun ha dentant laschà sentir che sias simpatias sajan plitost da la vart dal cusseglier guvernativ da Zug, Martin Pfister.
- La Partida socialdemocratica na dat nagina recumandaziun per l'elecziun. Omadus candidats stettian politicamain memia dretg.
- La fracziun verda n'ha betg decidì ina recumandaziun. Ils temas clima, ambient e biodiversitad sajan represchentads memia pauc en la regenza.
Parlamentarias e parlamentaris discrets
Las politicras ed ils politichers grischuns èn discrets sch'i va per la dumonda tgi ch'è il favurit per il sez en il Cussegl federal. Mintgin di ch’el haja in favurit, na vul dentant betg tradir quel. «L’elecziun d’in cusseglier federal è ina elecziun anonima. Jau tradesch betg tgi ch'jau elegel», di il cusseglier dals chantuns Martin Schmid. Era discret è il cusseglier naziunal Roman Hug. El di be: «Mesemna savain tgi ch’è la meglra elecziun per la Svizra.» La cussegliera naziunala Anna Giacometti ha decidì tgi ch'è ses favurit. Dentant na tradescha er ella betg tgi. Ella accentuescha dentant che Martin Pfister haja pudì gudagnar vuschs pli fitg che parlamentarias e parlamentarias hajan emprendì d'enconuscher el.
Speziala è l’elecziun dentant per Martin Candinas: «Per mai èsi ina elecziun speziala perquai che nus elegiain insatgi da mia partida, dentant betg perquai ch’jau valeva ina giada sco pussibel candidat.» Era Jon Pult guarda cun auters egls sin ina elecziun. Cun quai ch’el era l’ultima giada en la situaziun da Martin Pfister e Markus Ritter haja el ina chapientscha umana per ils dus candidats. Dentant era el na tradescha betg tge num ch’el vegn a scriver sin il cedel d’elecziun.
