Il nov dretg da locaziun pertutgant la sutlocaziun va da l'aua giu. La finala han 51,6% da las Svizras e dals Svizzers ditg Na al project da votaziun. Be 48,4% han sustegnì la midada dal dretg da locaziun. I na dat pia naginas midadas tar la sutlocaziun en il dretg da locaziun. Sa participads a la votaziun èn radund 45% da las votantas e dals votants.
En egl dattan il foss dal rösti ed er il foss tranter citad e champagna: Ils chantuns da la Svizra romanda sco era las citads grondas – er en la Svizra tudestga – han refusà las novas reglas da locaziun. En ils chantuns rurals hai per gronda part dà in Gea.
Dretg da locaziun: sutlocaziun
Svizra: Midada dal dretg da locaziun: sutlocaziun
-
GEA
1'196'640 Vuschs
-
NA
1'274'814 Vuschs
Reacziuns sin il Na
Tenor il minister d'economia Guy Parmelin mussan ils dus Na als projects da dretg da locaziun ch'i dovria soluziuns equilibradas. Avant che novs projects duain vegnir tractads, stoppian ils interess da locataris e locaturs vegnir sondads. I dovria cumpromiss. La populaziun na saja betg stada persvadida da las soluziuns ch'il parlament haja elavurà per la sutlocaziun e per l'agen basegn, ha Parmelin ditg avant las medias a Berna. Ils projects hajan or da vista da la maioritad rinforzà il dischequiliber tranter locataris e locaturs. Ultra da quai na sajan blers betg stads pertscherts daco ch'i dovria las novas reglas, ha el aschuntà.
L'Associaziun da locataris scriva che cun refusar las novas reglas per la sutlocaziun saja la via libra per schliaziuns «vairas ed effizientas». Durant la campagna hajan ils aderents sincerà ch'els veglian chatschar las sutlocaziuns problematicas, repetitivas e durablas sur plattafurmas da reservaziun sco per exempel Airbnb. L'associaziun da locataris e locatarias envida ussa tut las acturas e tut ils acturs da collavurar a moda constructiva tar soluziuns sin plaun communal, chantunal e federal che obligheschan tut ils participants. Las Svizras ed ils Svizzers n'hajan vulì naginas reducziuns tar la protecziun dals locataris.
L'Uniun svizra d'artisanadi e mastergn deplorescha ch'ils dus projects da locaziun èn vegnids refusads. Ins haja manchentà la schanza da zavrar ils custs da regulaziun nunnecessaris en il dretg da locaziun. Il project da sutlocaziun avess rinforzà il dretg da proprietad e restabiliss l'equiliber tranter ils dretgs dal locatari e dal locatur, scriva l'uniun svizra d'artisanadi e mastergn en ina communicaziun la dumengia. Il project da schluccar las premissas per far valair l'agen diever avessian deliberà ils proprietaris ed ils locaturs da custs da regulaziun nunnecessaris, hai gì num vinavant.
Il Na als dus projects davart il dretg da locaziun na schlia nagins problems, uschia reagescha l’Associaziun svizra da proprietaris da chasas (HEV) sin sia sconfitta da dumengia. Locataris, locaturs e sutfittadaris avessan profità d’ina meglieraziun da la segirezza giuridica. Ils problems cun abus na vegnian er en il futur betg schliads. La midada da lescha en connex cun la sutlocaziun avessi augmentà la transparenza ed uschia contribuì a la protecziun da la sutlocaziun, vegn il president da l'associaziun, il cusseglier naziunal da la PPS, Gregor Rutz, cità en ina communicaziun.
Grischun di cleramain Gea a las novas reglas per la sutlocaziun
Il Grischun accepta cleramain il project che vul far pli restrictiv il dretg da sutlocaziun cun 56,4% Gea. Bunamain 40% dals votants e las votantas grischunas èn sa participads a la votaziun.
Il pli cler è il Gea hai dà a Buseno cun passa 86%. La pli ferma resistenza hai fin uss dà a Giuvaulta cun passa 58% Na.
Il Gea munta tranter auter, che persunas che vulan dar en sutlocaziun lur stanzas u abitaziuns, ston en l'avegnir far ina dumonda correspundenta a scrit a la locatura u al locatur. Lez u lezza dastga refusar ina sutlocaziun, cunzunt sch'ella dura pli ditg che dus onns.
Per tge vai?
Locatarias e locataris dastgan ozendi dar en sutlocaziun temporarmain lur abitaziun u stanzas. Mintgatant manca dentant il consentiment da la locatura u dal locatur. I dat cas nua ch'i vegn dà en sutlocaziun per in pretsch memia aut. Il parlament vul impedir abus e midar las regulaziuns. En l'avegnir ston las locatarias ed ils locataris che vulan dar en sutlocaziun stanzas, far la dumonda correspundenta en scrit a la locatura u al locatur. Ellas ston avair in consentiment en scrit. Locaturs dastgan da nov refusar ina sutlocaziun cunzunt sche quella duai durar pli ditg che dus onns. En cas d'abus po la locatura disdir il contract da locaziun cun in termin da 30 dis, sche in'admoniziun n'ha betg fatg effect.
