En Svizra èn actualmain 153'000 persunas senza lavur. Quai ha ditg Boris Zürcher dal Secretariat da stadi per l'economia a la conferenza da medias davart il coronavirus oz suentermezdi a Berna. Fin uss sajan vegnidas pajàdas 525 milliuns francs indemnisaziuns da lavur curta. Il schaner e mars eran quai anc mintgamai radund tschintg milliuns francs. Las cifras vegnian dentant anc a s'augmentar marcantamain. Fin uss è vegnì annunzià lavur curta per 1,85 milliuns lavurers. Quai correspunda a passa in terz da tut ils lavurers en Svizra.
Cassas anc plainas
Malgrà quests custs supplementars saja il fond da l'Assicuranza cunter la dischoccupaziun (ALV) bain emplenidas il mument. Ier saira haja l'agen chapital muntà a bun sis milliardas francs. Tenor la Confederaziun na dettia naginas stretgas tar las cassas. I saja anc memia baud da pretender ulteriurs meds, uschia Zürcher vinavant.
Eveniment betg previsibel
Sin la dumonda, daco ch'il SECO haja curregì sia prognosa da conjunctura a tala moda, ha Boris Zürcher ditg che la situaziun actuala na saja betg stada previsibla. I sa tractia dad in eveniment istoric extraordinari che saja grev da predir. Er auters instituts hajan gì prognosas falladas.
