L'Uffizi federal da statistica (UST) ha publitgà venderdi las cifras las pli novas da la tschintgavla Svizra. Questas cifras conferman il trend dals ultims onns: Adina dapli Svizzers a l'exteriur vivan en tut las gruppas da vegliadetgna a l'exteriur sco Swissinfo scriva en ses artitgel. Cumpareglià cun l'onn 2023 è la populaziun da las Svizras e dals Svizzers a l'exteriur s'augmentada per 13'300 persunas (+1.6%).
Cun excepziun dal 2017 na ha il dumber da Svizzers domiciliads a l'exteriur betg chalà da crescher dapi il 2002, passond da 598'000 a 826'700 il 2024. Uschia fiss la diaspora helvetica, en teoria, il quart pli grond chantun dal pajais, gist suenter il Vad.
Tenor la statistica la pli recenta da l'UST èn burgaisas e burgais svizzers domiciliads en 192 dals 197 pajais. Mo tschintg pajais n'han uffizialmain nagins burgais helvetics.
En la statistica cumparan las persunas svizras che n'han nagin domicil en Svizra e ch'èn s'inscrittas tenor la Lescha federala davart las Svizras ed ils Svizzers a l'exteriur tar la represchentanza cumpetenta dal pajais respectiv en il register dals Svizzers a l'exteriur. Er Svizzers u Svizras che lavuran per exempel per il Departament federal d'affars exteriurs DFAE – en funcziun diplomatica ni consulara – tutgan en questa categoria.
Nua che la tschintgavla Svizra n'ha anc mai fitgà pe
Mo en in sulet pajais na vivevan dapi la registraziun da las datas da l'UST ils ultims 31 onns mai Svizras e Svizzers: Nauru il pitschen stadi insular en il Pacific en il nordost da l'Australia, 14'473 kilometers davent da la capitala da Berna.
Cun mo 21 kilometers quadrat è Nauru il terz pli pitschen pajais dal mund. En ils onns 1970 valeva l'insla populada oz da circa 12'000 abitants sco in dals pajais ils pli ritgs dal mund - grazia a l'explotaziun dal fosfat. Ma las reservas da fosfat èn exaustas e Nauru è finì tranter ils pajais ils pli povers. Il pajais è er vegnì en las lingias grassas perquai che l'Australia aveva in champ da fugitivs sin l'insla u er perquai che Nauru ha ina da las ratas da diabetes las pli autas dal mund.
En il Turkmenistan n'èn dapi il 2016 sa registradas naginas persunas svizras pli. La republica presidiala cunfinescha cun la Mar caspica, l'Iran, l'Afghanistan, l'Usbekistan ed il Kasachstan. L'onn 2010 vivevan ina giada otg burgaisas e burgais svizzers en il stadi autoritar ch'è enconuschent per sias reservas da gas natiral.
La pandemia ha procurà per ina depopulaziun
Sin las Inslas da Marshall e sin Palau sco er en la Corea dal Nord eran fitg paucas Svizras e paucs Svizzers annunziads tar las represchentanzas fin a l'erupziun da la pandemia da Covid l'onn 2020. Fin l'onn 2020 vivevan maximalmain duas Svizras e dus Svizzers a l'exteriur sin las Inslas da Marshall. La republica sa chatta circa a mesa via tranter Hawaii e las Filippinas en il Pacific. Dapi l'onn 2021 n'èn naginas Svizras e nagins Svizzers pli turnads sin l'insla.
Sin Palau è dentant puspè s'annunzià dapi il 2023 ina Svizra u in Svizzer.
DSC ch'è sa retratga da la Corea dal Nord
En la Corea dal Nord na chattan ins dapi l'onn 2022 nagins Svizzers pli en la statistica. Avant eran – dapi la registraziun da las datas – adina annunziads insaquants burgais svizzers en il stadi totalitar. La Svizra s'engascha dapi il 1995 en la Republica populara democratica da Corea. L'engaschi da la Direcziun per svilup e cooperaziun (DSC / Deza) ha cumenzà da lez temp cun agid umanitar per la populaziun pertutgada da la greva fom durant ils onns 1990.
La Svizra ha dentant sistì sia activitad da project en il pajais - quai suenter che la Corea dal Nord aveva serrà ils cunfins pervia da la pandemia. La serrada dal biro da cooperaziun da la DSC a Pjöngjang ha la finala manà a quai che nagin Svizzer e nagina Svizra abitan uffizialmain en la Corea dal Nord.
Qua viva precis ina persuna svizra
Il sguard en la statistica dals Svizzers a l'exteriur mussa che las Svizras ed ils Svizzers pon chattar adina puspè ina patria lunsch davent. Uschia viva in sulet Svizzer en ils stadis federativs da la Micronesia. Da l'unic Svizzer a l'exteriur sin Yap – in da quatter stadis insulars en il Pacific dal Vest – è vegnì rapportà gia pliras giadas. Fredy Gull viva tenor il Tages-Anzeiger passa ventg onns sin l'insla. Là fa l'um da 79 onns biera e sa anc fitg bain da sia veglia patria malgrà la distanza da 12'951 kilometers.