Persunas minorenas ch'ins ha spusà duajan vegnir protegidas meglier en Svizra. Il Cussegl dals chantuns ha ditg uanimamain Gea a las midadas correspundentas en il Cudesch civil svizzer. Il mument èsi anc uschia, sch'in uffant minoren vegn spusà a l'exeriur e vegn pli tard en la Svizra ed annunzia la maridaglia cun 18 onns na pon ins betg pli annullar la lètg perquai che la persuna è maiorena. Danov duai ina annullaziun esser pussaivla enfin il 25avel anniversari. Sco proxim traca il Cussegl naziunal la fatschenta.
Naginas novas reglas d'ierta per interpresas
Il Cussegl dals chantuns na vul savair nagut da novas reglas per laschar en ierta interpresas pitschnas e mesaunas. El ha danovamain refusà las midadas en il cudesch civil per simplifitgar la successiun da l'interpresa concernent il dretg d'ierta. Cun la decisiun ha il Cussegl dals chantuns confermà sia decisiun da la stad passada. Malgrà ch'il Cussegl naziunal era entrà en la fatschenta è quella ussa giud maisa. La maioritad en la Chombra pitschna è stada da l'avis ch'i na dettia nagin basegn per regulaziuns. En ils blers cas funcziuneschia l'ereditad dad ina interpresa en enclegientscha.
Revisiun da lescha davart las patentas è sut tetg
La Svizra modernisescha sia lescha davart las patentas. Il Cussegl dals chantuns ha rumì la davosa differenza ed ha approvà ina proposta da cumpromiss dal Cussegl naziunal en connex cun il dretg da far recurs. En l'avegnir han recurs da princip nagin effect suspensiv. Il punct central da la revisiun da la lescha davart las patentas è ch'ins giuditgescha da nov durant la procedura da patentas era sch'ina invenziun è effectiv nova. Quai n'èra enfin ussa betg il cas ed uschia era la valaivladad d'in patent svizzer intschert.
Taxas da far servetsch civil duai tut tenor vegnir augmentada
Il Cussegl naziunal vul savair co che l'Uffizi federal per il servetsch civil po en l'avegnir finanziar cumplettamain las persunas che fan servetsch civil be entras las taxas ch'ils manaschis d'engschament ston pajar. Cun ina gronda maioritad ha el surdà in postultat da sia cumissiun da finanzas al Cussegl federal. Tranter auter duai era vegnir examinà sch'i dovria in augment da la taxa per pudair cuvrir ils custs cumplettamian fin il 2027. Gia oz è quest grad da cuvrida dals custs tar 90%. Ozendi munta la contriubziun dals manaschis per di da servetsch a radund 20 francs ed 80.
Giavisch da midar renta d'uffants per geniturs che retiran l'AVS
Geniturs che retiran l'AVS e daners da la cassa da pensiun, na duain betg pli survegnir rentas per lur uffants. Questa midada sustegna ina maioritad dal Cussegl dals chantuns. Il model actual na saja betg gist, cunquai che geniturs che han gia rentas cumplainas profiteschian il pli fitg. Quai ha ditg il pledader da la cumissiun per la segirezza sociala e la sanadad dal Cussegl naziunal, Andri Silberschmidt. Enstagl duain da nov pertutgads e pertutgadas cun entradas bassas survegnir la pussaivladad da dumandar per prestaziuns supplementaras. Uschia spera il Cussegl naziunal d'eliminar sistematicamain discriminaziuns.
Ina minoritad da la PS e dals Verds ha vuschà cunter las midadas. La fatschenta va uss en il Cussegl dals chantuns.
Credit da milliuns per digitalisar fatgs da sanadad
Il Cussegl naziunal vul far vinavant cun la digitalisaziun tar ils fatgs da sanadad ed ha perquai decis in pachet da promoziun da prest 400 milliuns francs – quai per ils proxims 10 onns. El ha approvà il program Digisanté, vul però accumpagnar quel stretgamain. En la debatta hai er dà vuschs criticas. Uschia ha la fracziun da la PPS vuschà encunter il program da milliuns. Quai tranter auter cun l'argument che las finanzas da la Confederaziun sajan sut squitsch e ch'i saja da restrenscher las expensas per la sanadad. La fatschenta va uss en il Cussegl dals chantuns.
Daners russ per l'Ucraina
Il parlament ha decis che la Svizra duai s'engaschar en gremis internaziunals per ch'ils daners dal stadi russ ch'èn bloccads vegnian duvrads per reconstruir l'Ucraina. Suenter il Cussegl naziunal ha uss er il Cussegl dals chantuns approvà tschintg moziuns en quest connex. Il Cussegl federal ha ussa l'incumbensa da s'engaschar en gremis internaziunals sco las Naziuns Unidas per ch'i vegnia stgaffì in tal mecanissem. Daners dal stadi èn actualmain protegids entras il dretg internaziunal e na pon betg simplamain vegnir incassads.
Cussegl dals chantuns vul examinar construcziun d'ovras atomaras
Il Cussegl dals chantuns scurlatta in zic vi dal scumond da construir novas ovras atomaras ch'era vegnì decidì il 2017. El vul laschar examinar in scenari pussaivel da construir novas ovras atomaras en Svizra ed ha empustà in rapport correspundent tar il Cussegl federal. La pretensiun latiers vegn or da las retschas da la Partida liberaldemocratica svizra.
En il rapport pretenda Thierry Burkart ch'il Cussegl federal duai mussar co ch'il mix d'electricitad en Svizra sa sviluppescha. Era duai il Cussegl federal mussar quants implants per energia regenerabla che stuessan vegnir construids fin il 2030 per pudair garantir il provediment d'electricitad era sche las ovras atomaras vegnan ina giada tschentadas giu. Da construir novas ovras atomaras duai latiers er esser in scenari.
Midar pli simpel autos da benzin en autos electrics
Autos cun motors da benzin u diesel duain en l'avegnir pudair vegnir bajegiads enturn pli simpel en in auto electric. Quai vul suenter il Cussegl naziunal uss er il Cussegl dals chantuns.
La Chombra pitschna ha approvà mesemna la moziun dal cusseglier naziunal da la PS dal Tessin, Bruno Storni, cun 36 cunter 2 vuschs ed in'abstenziun. Ella va uschia per la realisaziun a la regenza dal pajais.
Prescripziuns ed ordinaziuns memia strentgas han ord vista economica fatg praticamain nunpussaivel la restructuraziun dals vehichels sin via, ha Storni scrit en sia intervenziun. La midada dals vehichels ch’èn en funcziun saja ina schanza ch’i valia la paina da nizzegiar.
Studis mussian tranter auter che la midada ecologica chattia savens dapli accoglientscha che la cumpra dad in nov auto electric, uschia in dals arguments. Il Cussegl federal ch'era cunter la proposta sto ussa sbassar ils obstachels per ina tala midada.
Parlament fa pli grev d'introducir tempo 30
Il parlament vul damain limitaziuns da tempo 30 sin las vias svizras. Suenter il Cussegl naziunal ha uss er il Cussegl dals chantuns approvà ina moziun correspundenta. Quella pretenda ch'il Cussegl federal adatteschia la lescha dal traffic uschia ch'i daventia pli grev d'introducir tempo 30 sin impurtantas vias entaifer ils vitgs e las citads.
Gia oz impedeschian talas zonas il traffic e procurian per confusiun tar ils automobilists, uschia la maioritad dal Cussegl dals chantuns. L'Uniun svizra da las citads crititgescha però questa decisiun. Quella restrenschia l'autonomia da las vischnancas.
Congedi da paternitad
In congedi da paternitad da duas emnas duai er vegnir concedì sche l'uffant nascha mort u sch'el mora da la naschientscha. Suenter il Cussegl naziunal ha uss er il Cussegl dals chantuns approvà la moziun – ha dentant agiuntà ch'il congedi duai er vegnir concedì, sche l'uffant mora duas emnas suenter la naschientscha. Pervi da questa adattaziun sto la fatschenta anc ir ina giada enavos en il Cussegl naziunal.
Register naziunal d'armas è giud maisa
Armas da fieu n'èn er en futur betg registradas en ina banca da datas naziunala. Il Cussegl naziunal ha refusà in'iniziativa parlamentara or da las retschas dals verds che pretendeva in tal register. Cunquai è la fatschenta giud maisa. La maioritad dal Cussegl naziunal era da l'avis che las bancas da datas ch'ils chantuns han, bastian. Il register naziunal na portia betg dapli segirtad – muntass però lavur dubla e cunquai dapli birocrazia.
Parlament vul controllar pli stretg La Posta
La Posta dovra en il futur ina lubientscha dal Cussegl federal sch'ella vul cumprar autras fatschentas. Quai ha il parlament decis. La Posta sto en pli argumentar sias acquisiziuns envers la cumissiun parlamentara ch'è responsabla. Il parlament argumentescha sia decisiun cun il fatg ch'eventualas acquisiziuns problematicas da La Posta – pia d'ina fatschenta ch'è liada al stadi – pudessan muntar in ristg per la Confederaziun. Il Cussegl federal aveva refusà la moziun, sto uss dentant realisar quella.
Svizra duai gidar da rumir minas en l'Ucraina
La Svizra duai gidar da rumir minas en l'Ucraina. Ella duai porscher sustegn finanzial, persunal e material. Suenter il Cussegl naziunal ha er il Cussegl dals chantuns approvà in sboz da la Partida socialdemocratica. La Chombra pitschna ha però anc midà in zic il sboz. El vul ch'interpresas svizras – ch'èn gia activas en quest sectur – vegnan favurisadas. La fatschenta va perquai anc ina giada enavos en il Cussegl naziunal.
Protecziun gea, dentant auter
Ovras idraulicas svizras, ovras atomaras e raits electricas e da gas na duain betg vegnir suttamessas a la Lex Koller. Enstagl vul il Cussegl dals chantuns nizzegiar la lescha per examinar investiziuns ch’è en lavur – per decuraschar investiders da l’exteriur nungiavischads.
Il Cussegl dals chantuns ha refusà cleramain d’adattar la Lex Koller, la fatschenta va uss enavos al Cussegl naziunal. Ina minoritad sanestra vuleva ir a la via, ch’il Cussegl naziunal aveva decidì la stad passada. Tenor ils sanesters duai valair per la vendita d’infrastructura d'energia impurtanta en l’exteriur – via la Lex Koller il principi da «na, auter che».
Dapli reservas da mangiativas, energia e medicaments
En temps da stgarsezza duai la Svizra avair dapli reservas da products essenzials. Il parlament a Berna ha decidì d’augmentar las garanzias federalas per questas reservas per 210 milliuns francs, sin nov 750 milliuns francs. Quests daners stattan a disposiziun a las interpresas ch’èn obligadas da far reservas.
Tge products exact che la Svizra duai avair en il futur sco reservas, per far frunt a crisas – vul il Cussegl federal sclerir fin la fin dal 2024.
300 milliuns per ils cunfins exteriurs da Schengen
La Svizra duai cuntinuar ses engaschament finanzial per proteger ils cunfins exteriurs dal spazi da Schengen. Il Cussegl dals chantuns ha ditg fitg cler Gea a la fatschenta, che cumpiglia ina contribuziun da radund 300 milliuns francs sur set onns. Er il Cussegl naziunal aveva approvà la fatschenta, là era ina minoritad da la PPS s'exprimida cunter. Ella aveva crititgà che la protecziun dals cunfins exteriurs da Schengen na funcziunia betg.
