Per engrondir la rait da viafier svizra datti dapli daners. Per ils onns 2025 fin 2035 ha il parlament concedì 350 milliuns francs dapli che quai ch'il Cussegl federal aveva dumandà. L'avust passà aveva il Cussegl federal dumandà il parlament per 2,6 milliardas francs or dal fonds d'infrastructura da viafier.
Tunnel tranter Losanna e Genevra
Tranter auter vai per la construcziun d'in tunnel da viafier da nov kilometers tranter Morges VD e Perroy VD sin il traject Losanna – Genevra. Sulet quest project chaschuna custs supplementars da radund 1,3 milliardas francs tenor la planisaziun actuala. Quel duai esser construì fin il 2035 u il pli tard il 2040.
Tar il tunnel da basa dal Lötschberg èsi vinavant previs da construir sin l'entir traject dus vials, enstagl be da tschertas parts. Era per il tunnel dal Brütten e l'engrondiment da la staziun da Turitg-Stadelhofen ha la regenza naziunala decidì augments da credits. Ultra da quai vul ella metter a disposiziun daners per engrondir las staziuns da Genevra ed Olten SO.
