Igl è stà ina mesemna naira per la Credit Suisse. L'entschatta l'annunzia dal grond acziunari saudit ch'ins na vegnia betg ad investir dapli daners en la banca, silsuenter il curs d'aczias ch'ha cuntanschì in bass istoric e lura la dumonda da sustegn a la banca naziunala svizra SNB en l'autezza da 50 milliardas francs. Tut ensemen in di d'emblidar per la Credit Suisse. Gievgia a bun'ura guarda la situaziun gia or in zic auter: suenter l'annunzia da la SNB è il curs puspè sa stabilisà.
Damian Gliott, tanscha il sustegn da la Banca naziunala svizra uss per calmar la situaziun?
Sche quai tanscha vegnan ins a vesair. Quai è stà in'emprima reacziun. Il curs d'aczias è puspè sa revegnì in zic – ins sto però er dir ch'il curs era crudà immens ils ultims dus dis – e quai cun il sustegn da la Banca naziunala Svizra. Ils problems da la Credit Suisse èn però anc adina avant maun.
Tge problems èn quai propi?
Ils problems da la Credit Suisse existan gia dapi onns. Adina sch'i dat problems en il mund da las bancas è la CS segir davant tiers. Quai vul dir il management ha segir fatg fitg gronds sbagls. (Remartga: la banca è l'ultim temp adina puspè stada confruntada cun differents scandals; investiziuns dubiusas, datas da clientella ch'èn idas a perder eav.) L'ultim temp è la clientella alura adina vegnida pli gnervusa ed ha cumenzà a retrair daners e quai è fitg privlus per mintga banca, tuttina quant buna che la bilantscha è.
Pon ins cumparegliar la situaziun actuala cun la crisa da finanzas dal 2008 – nua che la Banca naziunala Svizra aveva stuì spendrar la UBS?
Uss è la situaziun tut in'autra; las bancas èn capitalisadas bler meglier, er ina Credit Suisse. Il risico è bler pli pitschens ch'il 2008 e tuttina – sche la confidenza n'exista betg pli, alura è il risico relativamain aut – or da quest motiv n'hai dà nagin'autra opziun ch'il sustegn da la Banca naziunala svizra. Er sche quella aveva adina ditg ch'ins na vegnia betg pli a far quai, da dir; bain sche la situaziun è uschia vegnin nus e finanziain la Credit Suisse cun quellas 50 milliardas francs. Nus stuain era dir, la CS ha era segirtads per 50 milliardas – la Banca naziunala na ristga pia betg grondas summas en quella situaziun.
Tge consequenzas ha la situaziun actuala per la clientella?
Da principi na capita nagut. Ils clients han anc adina lur daners tar la Credit Suisse. Sch'els han investì lur daners en aczias ed obligaziuns capità insumma nagut, era betg tar in concurs. Ils daners ch'els han sin il conto pudessan els dentant perder fin a 100'000 francs (remartga: fin ad ina summa da 100'000 francs èn ils daners protegids entras il stadi) sche la banca gess vairamain concurs.
