La banca gronda UBS pudess surpigliar la concurrenta Credit Suisse che sa chatta en la crisa. Tenor in rapport da la «Financial Times» examineschia l'UBS da surpigliar l’entira banca u almain ina part. Ils cussegls d’administraziun da las duas bancas grondas svizras s’inscuntrian questa fin d'emna dapersai per discutar las diversas opziuns da fusiunar.
La gasetta britannica sa referescha tar ses rapport ad insiders. La Banca naziunala svizra e la Surveglianza federala dals martgads da finanzas Finma hajan organisà ils discurs. Quai cun la finamira da rinforzar la fidanza en il sectur da bancas svizzer. Ni l'UBS ni la CS han fin uss vulì prender posiziun en chaussa. In'anteriur directur da la Finma, Eugene Haltiner, ha ditg che la cumissiun da concurrenza Weko vegnia ad esser sceptica qua. Omaduas bancas sajan dominantas en la fiera svizra.
Curs d'aczias da la CS strusch sa revegnì
Il curs da l'aczia da la Credit Suisse resta bass. La gievgia è el anc terminà tar 2,02 francs, il venderdi a las 11:00 è el dentant gia puspè stà sut la marca. Malgrà ch'igl n'ha dà naginas schlettas novitads durant la notg. Venderdi è el terminà tar 1,86 francs.
Er auters instituts svizzers sco Julius Bär e l'UBS aveva il moviment a la bursa tschiffà temporarmain. Cura che la Banca naziunala svizra ha annunzià da sustegnair la CS cun 50 milliardas ha quai dentant chalà.
Gnervusitad sin la fiera globala
Il squitsch sin la fiera è generalmain grond. Cumenzà aveva tut cun problems da bancas americanas. Il stadi american è gia intervegnì ed ha indemnisà la clientella da la Silicon Valley Bank ch'ha fatg concurs. In'ulteriura banca americana, la First Republic Bank, è vegnida sustegnida il venderdi d'autras bancas americanas. Il venderdi vegnan er la surveglianza da la bancas centrala europeica EZB a sa scuntrar per discutar la situaziun.
Er ils auzaments da tschains directivs èn in motiv per la situaziun tendida a la bursa. La gievgia ha la Banca centrala europeica annunzià in ulteriur auzament per 0,5%. Era la Banca naziunala americana e la Banca naziunala svizra annunzian l'autra emna probabel d'auzar ils tschains directivs. Quai munta ch'i vegn pli char da prender si daners per las bancas, ed auza ils tschains ipotecar per la clientella. En lunga vista smanatscha ina recensiun.
Intervenziun dal Stadi per la Credit Suisse
La crudada dal curs d'aczias da la Credit Suisse ha pir chalà cur che la Banca naziunala svizra ha annunzià in credit da 50 milliardas francs per ella. Quai è stà mesemna saira. Avant è l'aczia da la CS ida per l'emprima giada sut la valur da 2 francs – maximalmain hai dà mesemna ina perdita da passa 30%, ed in record negativ cun ina valur da 1,56 francs.
Il schef dal concern Ulrich Körner ha ditg en in'intervista, suenter la perdita da valur da l'aczia: «Nus essan ina ferma banca. Nus essan ina banca globala ch'è suttamessa a la regulaziun svizra. Nus ademplin e surpassain da princip tut las pretaisas regulatoricas.»
