La banca Credit Suisse scriva vinavant cifras cotschnas. Sut il stritg haja la banca gronda fatg ina perdita da 7,3 milliardas francs l’onn passà. Quai suenter in minus da 1,6 milliardas francs il 2021, suenter ch'il fonds «Archegos» era dà ensemen ed ils «Greensill» fonds èn vegnids liquidads. I sa tracta dal mender resultat dapi la crisa da finanzas il 2008, cura che la CS ha pers 8,2 milliardas francs.
Da contribuir saja quest resultat cunzunt ad amortisaziuns en connex cun la restructuraziun dal concern, ma er cun il gudogn che saja crudà ensemen en l’investment-banking, ha argumentà la banca. Il resultat correspunda però a las spetgas dals analists. Malgrà la perdita massiva duajan ils acziunaris survegnir ina dividenda da 5 raps per aczia.
