In tractament medicinal en l'ospital po far tema, surtut als uffants. Ussa datti però en l'Institut pediatric da la Svizra taliana (IPSI) ina vulp particulara che gida als pazients pitschens cunter questa tema e las dolurs. Sco RSI rapporta.
I sa tracta d'ina vulp virtuala en in gieu da video. L'uffant porta in headset cun in visur per la realitad virtuala e sa chatta en in mund fantastic, emblidond la tema. «Quai è in instrument che vegn duvrà per proceduras dolorusas, sco prender sang, metter access ad avainas, faschadas e far givellas», declera il dr. Gianluca Gualco, schef da servetsch al post d'urgenza da l'IPSI a Bellinzona.
Tut quests tractaments vegnan pia fatgs durant che l'uffant – per regla pazients tranter quatter e sedesch onns – è concentrà sin gidar la vulp en quatter missiuns. Quatter fasas dal gieu da video che accumpognan la procedura medicinala. Durant la pli intensiva, nua ch'il pazient è il pli stimulà, capita il tractament il pli dolorus, senza che l'uffant sa renda quint da quai. «Cur che tut è a fin, finescha il gieu en in ambient da muntogna cun lajets ed animals, nua che l'uffant po far festa cun fieus artificials», declera Gualco.
En l'IPSI, nua ch'ins dovra ils headsets dapi circa in onn, èn ils resultats positivs. «Il fatg da prender davent la tema da la procedura dolorusa ha in bun effect sin la famiglia e sin il persunal da tgira. I n'è betg pli necessari da tegnair ferm l'uffant che è bler pli relaxà durant il tractament». Plinavant permetta l'utilisaziun da la realitad virtuala d'evitar che l'uffant haja tema en cas d'ina visita posteriura al post d'urgenza.
