Ils Svizzers e las Svizras n'èn betg stads persvadids dals plans da la Confederaziun e dal parlament da cumplettar las vias naziunalas ed eliminar stretgas sin divers trajects per prest 5 milliardas francs. En tut 52,7% dal suveran svizzer han numnadamain ditg Na, 47,3% dal suveran han sustegnì ils plans d'extender las vias.
Cumplettaziun da las vias naziunalas
Svizra: Conclus federal davart la cumplettaziun da las vias naziunalas
-
GEA
1'181'557 Vuschs
-
NA
1'316'500 Vuschs
Project saja stà memia grond
Per il Na dal suveran datti tenor il cussegl federal trais motivs. Per exempel saja il pachet cumplessiv cun tschintg projects en Svizra tudestga ed in en Svizra romanda stà memia grond. Quai ha il minister da traffic Albert Rösti (PPS) ditg la dumengia saira avant las medias da la Chasa federala. Medemamain na saja betg reussì da mussar il niz dal pachet general a las regiuns betg pertutgadas dals projects, uschia Rösti vinavant. Tenor il cusseglier federal stoppia la problematica da las colonnas tuttina vegnir schliada en l'avegnir.
«Quai munta vinavant retards massivs pervi da colonnas»
Trumpà sa mussa il champ ch'era per cumplettar las vias naziunalas. Ins respectia sa chapescha il resultat, di per exempel il cusseglier naziunal Thomas Hurter (PPS), ch'è collega da partida d'Albert Rösti, il minister dal traffic. Tenor el munta il Na che projects èn bloccads en las regiuns pertutgadas per ils proxims 10 fin 15 onns. Il cusseglier naziunal Benjamin Giezendanner (PPS) vesa il resultat sco schleppa per l'economia e tut quels che creeschan valur en la Svizra. Pervi dal Na saja tenor Giezendanner numnadamain vinavant da spetgar «retards massivs pervi da colonnas». Quai chaschunia che rauba transportada arrivia cun retard e ch'ils pretschs creschian.
Champ Na vul che la politica da traffic sa mida
Pliras organisaziuns ch'èn s'engaschadas per in Na tar la proposta da cumplettar las vias naziunalas per prest 5 milliardas francs, pretendan che la politica da traffic sa midia. I saja da promover pli ferm il traffic public e vias segiras per ciclistas e ciclists.
Pro Velo Svizra vul per exempel ch'ina part dals daners ch'eran previs per schlargiar las vias naziunalas vegnia uss investida en vias da velos. Da quest'opiniun è er la Partida verd-liberala: «La via è uss libra per organisar nossa mobilitad cun schliaziuns ecologicas e smartas», manegia per exempel la cussegliera naziunala Barbara Schaffner. Tenor l'organisaziun Klimastreik Schweiz mussia il resultat, che las infrastructuras «fossilas» na sajan betg dumandadas pli.
Grischun refusa cleramain l'investiziun en la rait da vias
Ina clera maioritad da las Grischunas e dals Grischuns ha medemamain refusà la proposta d'eliminar stretgas sin divers trajects da las vias naziunalas – quai cun 57,3% Na envers 42,7% vuschs a favur da la fatschenta. 40,16% dal suveran grischun è sa participà a la votaziun.
Il pli cler Na han ils votants e las votantas da la vischnanca da San Vittore dà cun 74,34%. Sulettamain 16 da las total 101 vischnancas grischunas han la finala ditg Gea a la proposta da la Confederaziun e dal parlament. Per cumplettar las vias naziunalas eran cunzunt la vischnanca da Buseno cun 86,67% Gea e Samignun cun 67,3% Gea.
Per tge vai?
Cun cumplettar las vias naziunalas en tscherts lieus vulan il Cussegl federal ed il parlament meglierar la rait da vias e quai sin ils suandants sis trajects:
- A1 tranter Le Vengeron e Nyon
- A1 tranter Berna-Wankdorf e Schönbühl
- A1 tranter Schönbühl e Kirchberg
- A2 a Basilea (nov tunnel dal Rain)
- A4 a Schaffusa (2. fora dal tunnel Fäsenstaub)
- A1 a Son Gagl (3. fora dal tunnel Rosenberg)
Per quests projects èn planisads custs da 4,9 milliardas francs. Quels vegnan finanziads or dal fond per las vias naziunalas ed il traffic d'aglomeraziun. Cunter quests plans è vegnì prendì il referendum, perquai vegn il project avant il pievel.
