Avant in onn ha il Cussegl federal ed il parlament concludì che las vias naziunalas duain vegnir sanadas ed engrondidas per total 5,3 milliardas. Ils motivs: En divers lieus sajan las vias surchargiadas ed il traffic creschia stediamain. Las consequenzas sajan colonnas e traffic da sviament els vitgs che chaschunian custs supplementars per l’economia ed era per la populaziun. Da quella opiniun è era Martin Candinas, cusseglier naziunal da l'Allianza dal Center che s'engascha per il comité Gea grischun.
Nus avain dubel uschè bler traffic sin las vias naziunalas che avant 30 onns. La populaziun è era creschida da 7 sin 9 milliuns – e quai mussà ch’i dovra investiziuns.
Conferenza da medias dal comité Gea grischun
-
Bild 1 von 2Legenda: Comité Gea grischun Da sanester: Jan Koch (vizepresident da l'uniun d'artisanadi e mastergn) e Martin Candinas (cusseglier naziunal). L’uniun grischuna d’artisanadi e mastergn ensemen cun il comité Gea grischun preschentan lur arguments per la cumplettaziun da las vias naziunalas. Renè Weber -
Bild 2 von 2Legenda: Comité Gea girschun en acziun Da sanester: Jan Koch (vizepresident da l'uniun d'artisanadi e mastergn), Martin Candinas (cusseglier naziunal), Livio Zanetti (president TCS grischun) e Roland Jäggi (president ASTAG grischun). Renè Weber
Daco duessan Grischunas e Hrischuns votar Gea?
Las vias naziunalas hajan ina immensa muntada per l'economia en Svizra e quai saja er en l'interess dal Grischun dad avair ina infrastructura che funcziuneschia, uschia Martin Candinas.
Vinavant pledescha el sin solidaritad envers las autras regiuns. Era sch'il Grischun n'è ussa betg directamain pertutgà, insacura vegn er il Grischun puspè vidlonder. Solidaritad vegn mo sch’ins sa mussa era solidarics cun autras regiuns.
Partidas sanestras ensemen cun organisaziuns da l’ambient s’engaschan encunter il project
Schliar la sfida dal traffic creschent, quai vulan er ils adversaris dal project che han prendì il referendum – dentant sin in'autra moda e maniera. Ellas ed els èn da l’opiniun che cun engrondir las vias naziunalas, vegnia chaschunà mo anc dapli traffic. E dapli traffic muntia era dapli canera, dapli substanzas nuschaivlas en l’aria ed era dapli asfalt. Yvonne Michel Conrad, la mainafatschenta da l'Associaziun traffic ed ambient VCS s’engascha per il comité Na grischun.
Cun engrondir las vias naziunalas vegni chaschunà mo anc dapli traffic. Forsa dessi in curt levgiament entaifer ils emprims dus onns – ma suenter dessi puspè dapli autos ed il traffic s’augmentass.
Conferenza da medias dal comité Na grischun
-
Bild 1 von 2Legenda: Comité NA grischun presenta lur arguments: Da sanester: Jon Pult (cusseglier naziunal), Kaspar Schuler (suprastanza partida Verda dal Grischun), Laura Oesch (deputada GLP) e Beat Deplazes (president WWF grischun) preschentan lur arguments encunter il project. Yvonne Michel Conrad
-
Bild 2 von 2Legenda: Yvonne Michel Conrad Mainafatschenta da l'Associaziun traffic ed ambient VCS. Yvonne Michel Conrad
Daco duessan Grischunas e Grischuns votar Na?
Per Yvonne Michel Conrad, dal comité Na, è cler: Per il chantun Grischun n'avess in engrondiment da las vias naziunalas nagina plivalur – auter ch'anc dapli autos vegnissan en il Grischun. Il comité Na vuless mantegnair las vias, ma betg anc engrondi quellas. La populaziun grischuna na vegn gea era betg pli gronda, il cuntrari è il cas. Quai ston ins uss atgnamain far endretg ed investir en in sistem pli persistent.