Tenor Beat Wittmann, expert da finanzas cun bunamain 40 onns d'experientscha, mussa il rapport da la Cumissiun parlamentara d'inquisiziun (PUK), cleramain che la surveglianza haja desditg e purtà al «terratrembel» sin la plazza da finanzas. Il rapport da bun 600 paginas saja cumplet. Uss dependia però tge che succeda cun quel.
Igl è ussa decisiv tge ch'ins fa cun il rapport. Sch'ins prenda l'occasiun da propi prender per mauns las refurmas necessarias per crear las cundiziuns generalas per ina plazza da finanzas cumpetitiva e natiralmain era per ina banca UBS che po concurrenzar sin plaun internaziunal.
L'expert crititgescha il Departament federal da finanzas, la Banca naziunala svizra e l'Autoritad federala per la surveglianza dals martgads da finanzas (FINMA) per lur mancanza da coordinaziun e survegliaziun. El è da l'avis ch'il mecanissem da surveglianza stoppia vegnir rinforzà ed adattà als standards internaziunals. Ideal fiss tenor el la Banca centrala europeica (EZB).
Wittmann sa mussa dentant pessimistic areguard la voluntad politica da realisar questas refurmas. Il tema saja fitg tecnic e cumplitgà, di l’expert. El ha l'impressiun che nagin na vul propi sa brischar la detta vidlonder.
Per mintga politicher a Berna è quai material toxic che na porta naginas vuschs.
Il parlament debattescha en questa sessiun sur dal rapport da la PUK e pussiblas regulaziuns.
Co enavant cun l’UBS?
L'expert valitescha la situaziun da l'UBS sco «fitg buna e stabila» per il mument. Dentant il test da stress riva cura ch'i dat ina crisa da finanzas u ina recessiun.
La Svizra na pudess betg sa prestar in nov cas 'Credit Suisse'. La proxima giada n'è numnadamain nagin'autra banca svizra d’enturn per salvar la UBS.
Sche la politica n’adatteschia betg las regulaziuns als standards internaziunals haja l'UBS duas opziuns: midar il sez en l’exteriur ubain midar il model da fatschenta.
Cussegl dals chantuns vul reglas pli severas
Il Cussegl dals chantuns vul reglas pli severas per bancas relevantas per il sistem suenter la fusiun urgenta da la CS. El ha approvà ina moziun correspundenta da la cumissiun parlamentara d'inquisiziun (PUK) davart la crisa da la CS.
Concretamain pretenda la PUK ch'i vegnia limità las facilitaziuns da las prescripziuns davart ils agens meds e las prescripziuns da liquiditad per bancas ch'èn relevantas per il sistem. Per quest intent duai il Cussegl federal elavurar in sboz per in relasch.
Questa pretensiun ha la cumissiun fatg perquai ch'ella è vegnida en il rapport davart la fusiun d'urgenza da la Credit Suisse e da l'UBS a la conclusiun, che la surveglianza svizra dals martgads da finanzas Finma haja concedì a la CS a partir da l'onn 2017 facilitaziuns cumplessivas areguard pretensiuns envers agens meds. Quest «filter regulatoric» haja zuppentà la situaziun reala da la CS.
Sco relevantas per il sistem vegnan considerads en Svizra la banca UBS, la banca chantunala turitgaisa, la Raiffeisen e la Postfinance. La moziun da la PUK va ussa al Cussegl naziunal. L'intervenziun numnada appartegna a totalmain 10 intervenziuns da la PUK davart la crisa da la CS. Il Cussegl dals chantuns ha acceptà il glindesdi tuttas.