La crisa da la Credit Suisse è stada surprendenta per ils ins, per ils auters mo «in punct culminant d'in svilup catastrofal.» Quai ha Jon Pult da la PS ditg envers RTR. Perina è el cun Magdalena Martullo-Blocher (PPS) e Martin Schmid (PLD) ch'i na saja betg bun che la Banca naziunala ha stuì sustegnair la Credit Suisse cun in credit da pliras milliardas francs.
Nagina raschun da midar insatge per Martullo-Blocher
Ch'ins stoppia intervegnir en da quels cas dettia adina puspè, di Martullo-Blocher. Il cas saja dentant in auter che tar l'UBS e la crisa da finanzas. Il privel per la Confederaziun saja quella giada considerablamain pli pitschen. Martin Schmid, ch'ha da ses temp lavurà vi da pli fermas restricziuns suenter la crisa da finanzas mundiala, n'è betg d'accord. Ina part da las ristgas da liquiditad n'hajan ins betg vesì, e qua stoppian ins anc ina giada ponderar la chaussa.
Jon Pult da la PS vul far in pass pli lunsch e restrenscher pajaments da bonus en quels cas. I dovria ina lescha ch'eviteschia che la direcziun ed il cussegl administrativ possia vinavant gudagnar bleras milliuns francs, uschia Pult. Sche regular e quant fitg, quai resta pia dispitaivel tar ils dus parlamentaris e la parlamentaria.
