La Surveglianza federala dals martgads da finanzas examinescha sch’il management da la Credit Suisse actual po vegnir fatg responsabel per il debachel da la banca. Bain na saja la FINMA betg in’autoritad penala, dentant giaja persuenter da sondar las pussaivladads. Quai ha ditg la presidenta da la FINMA, Marlene Amstad en in’intervista cun la «NZZ am Sonntag».
Anc saja avert, sch’i dettia novas proceduras. Suenter la surpigliada saja il focus la fasa da transiziun da l’integraziun da la CS en la UBS, sco er la stabilitad finanziala. En tut cas veglia la FINMA augmentar progressivamain las pretensiuns pertutgant chapital e liquiditad da la nova banca gigantica.
Pfister pretenda dapli agen chapital per bancas
Gerhard Pfister, il president da l’Allianza dal Center, pretenda che las bancas stoppian avair ina quota d’agen chapital pli gronda. Sco Pfister ha ditg envers il «SonntagsBlick», stoppia questa quota muntar a 20 pertschient. Tenor divers experts fiss quai raschunaivel, uschia Pfister. La quota d’agent chapital insuffizienta saja il coc dal problem.
Memia pauc agen chapital saja in ristg, che na dastgia betg pli vegnì adossà als pajataglias. Questa idea n’è betg nova ed è fin uss vegnida pretendida da la sanestra. La politica stoppia chalar da refusar in’idea da princip, mo perquai ch’ella vegnia d’autras partidas, uschia Pfister vinavant.
CEO Ulrich Körner sa drizza al persunal da la Credit Suisse
En in scriver ha il schef da la Credit Suisse, Ulrich Körner, defendì la surpigliada da la banca tras la concurrenta UBS. Quai rapporta l’agentura da novitads Keystone-SDA. La decisiun na saja betg stada simpla ed el deploreschia la situaziun. Dentant saja quai la suletta opziun praticabla. Ella dettia tant a la clientella sco er al martgà stabilitad e segirezza.
Cunquai che la fusiun saja vegnida decidida entaifer mo quatter dis, sajan anc bleras dumondas praticas avertas. Fin che la transacziun saja giuridicamain terminada en il decurs da l’onn, restian las duas bancas independentas – uschia Körner vinavant.
