La populaziun ha da principi ina tenuta sceptica envers la surpigliada da la Credit Suisse entras l'UBS. 54% da las persunas ch'han fatg part da la retschertga n'èn insumma betg u plitost betg d'accord cun la moda co l'UBS ha surpiglià la CS cun agid da la Confederaziun. Visavi stattan radund in terz da la populaziun (35%) che va d'accord u plitost d'accord cun la soluziun. En egl dat la cumpart fitg pitschna da 5% ch'è fitg d'accord.
Simpatia per la varianta ch'il stadi surpiglia
Dasper questa sceptica e critica datti dentant tuttina ina tscherta simpatia per la varianta ch'il stadi avess surpiglià a curta vista la banca. 40% avessan preferì questa varianta. Inclusiv ils 16% ch'èn da l'avis che la varianta fiss stada tuttina buna sco la surpigliada entras la UBS, dess quai perfin ina maioritad da 56%. Sper aderents da la Partida socialdemocratica e dals verds preferissan er aderents da la Partida populara ch'il stadi avess surpiglià temporarmain la banca.
La varianta d'in concurs controllà da la Credit Suisse beneventa be ina pitschna part.
Gritta e malsegirezza èn las emoziuns che domineschan
La maioritad dals dumandads èn in'emna suenter il deal en il mund da banca grits (66%) ubain malsegirs. La gritta è cunzunt gronda tar la sanestra ma er en auters champs politcs è ella ferma, quai sper l'emoziun da malsegirezza. Per gronda part calms e cun speranza inditgeschan sulettamain ils aderents da la PLD d'esser. L'emoziun da tema è be minoritara.
Pretensiuns a la politica
Trais pretensiuns a la politica survegnan grond sustegn en la retschertga da gfs.berna. Quellas èn:
- obligaziun da far responsabel il cussegl d'administraziun da la Credit Suisse
- mesiras cunter abus en il champ da bancas
- pretensiun che gudogns na duain betg restar privats e da statalisar ristgs
Tut questas pretensiuns che vegnan per part sustegnidas da la gronda maioritad mussan propi quant gronda che questa gritta da la populaziun è actualmain.