Il CEO sa retiria suenter la preschentaziun da las cifras dal 2019, planisada per l'emna che vegn, scriva la banca. Il cussegl d'administraziun ha approvà unanimamain la demissiun da Thiam. Il schef partent sa lascha citar sco suonda en la communicaziun:
Jau sun ma cunvegnì cun il cussegl d'administraziun, ch'jau bandun la banca. Il medem mument sun jau losch da quai ch'il team ha dumagnà durant mes temp.
La Credit Suisse saja vegnida transfurmada cun success, haja ditg Thiam.
Plinavant ha Thiam dentant sincerà vinavant ch'el n'haja savì nagut da quai ch'ils top-managers sajan vegnids survegliads. Gliez aveva chaschunà grondas undas l'atun 2019.
Jau n'hai gì nagina enconuschientscha da la surveglianza da dus da mes collegas.
Dentant saja el pertschert che quest cas haja fatg donn a la Credit Suisse e ch'il cas haja chaschunà malsegirezza e suffrientscha. El deploreschia quai che saja capità, quai n'avessia mai pudì capitar.
Rohner ha fidanza dal cussegl d'administraziun
Entant ha il cussegl d'administraziun dentant articulà da fidar ad Urs Rohner. Rohner haja manà la CS durant quest temp turbulent a moda suverana. El duai restar president dal cussegl d'administraziun fin l'avrigl 2021.
Ord l'archiv da SRF
RTR novitads 08:00
