En tut han possessurs e possessuras d'obligaziuns perdì 8 milliardas francs ils 19 da mars. Il Cussegl federal e la Finma avevan stritgà quellas obligaziuns (uschenumnads instruments d'AT1) cura che la surpigliada da la Credit Suisse tras l'UBS era vegnida decisa.
Uss haja dà emprims plants pervi da quai, conferma il Departament federal da finanzas envers la «SonntagsZeitung». Da stritgar las obligaziuns è vegnì crititgà en l'exteriur, per exempel da la Bank of England e la Banca europeica centrala.
Dispitas giuridicas spetgan
Uschia scriva la «SonntagsZeitung» che custs da 8 milliardas francs pudessan spetgar la Confederaziun. Ils possessurs e las possessuras pretendan ch'i saja stà in'expropriaziun da stritgar las obligaziuns. Pervi da quai hajan els in dretg sin in'indemnisaziun tenor dretg internaziunal.
La Confederaziun sa basa percunter sisura ch' ils uschenumnads instruments d'AT1 dastgan tenor contract cun ils debiturs vegnir stritgads sch'il stadi sto porscher sustegn extraordinari.
