Il Cussegl federal haja prendì per enconuschientscha che'il Cussegl federal ha ditg duas giadas Na als credits d'obligaziun per las garanzias a favur da la Banca naziunala Svizra (SNB). Senza quests credits n'avess la surpigliada da la CS e la stabilisaziun dal sistem da finanzas betg pudì vegnir realisada. Sco il Cussegl federal scriva en sia communicaziun, saja il parlament dentant er stà pertschert che la refusa n'haja nagin effect sin ils credits d'obligaziun.
Ils credits han ins gia approvà ils 19 da mars, il di che l'UBS ha surpiglià la CS cun agid da dretg d'urgenza. L'approvaziun entras la delegaziun da finanzas dals parlamentaris federals – che consista da sis parlamentarias e parlamentaris – è stada il medem di.
Aeschi era da l'avis ch'il Na haja consequenzas
La garanzia da la banca naziunala na saja betg pertutgada, auter vesia or tar las nov milliardas dal Cussegl federal. Il Na dal Parlament federal en connex cun ils credits da la Confederaziun per la surpigliada da la Credit Suisse tras l'UBS haja consequenzas directas. Da quest avis è il schef da la fracziun da la PPS Thomas Aeschi.
Sia partida aveva refusà ensemen cun la PS ed ils Verds las garanzias. Almain sin las nov milliardas garanzia da sperdita per l'UBS stoppia il Na avair in effect, ha ditg Aeschi en la Samstagsrundschau da Radio SRF. Perquai che quest contract n'existia anc betg e stoppia anc vegnir negozià. Cun quai cuntradi Aeschi a la ministra da finanzas Karin Keller-Sutter ch'aveva ditg gia en il parlament ch'il Na n'haja naginas consequenzas.
