Entant che grondas parts dal Grischun eran gia populadas da lufs ils ultims onns, era l’Engiadina anc in flatg grisch. Uss è quai tut auter. Enturn Zernez viva in dals pli gronds trieps da lufs dal Grischun ed auters èn sparpagliads en tut la regiun. Tut en tut sajan quai radund 15 lufs, uschia las infurmaziuns da l’Uffizi da chatscha e pestga.
Guardiaselvaschina observeschan
Ina situaziun dal tuttafatg nova per la populaziun e per ils purs en l'Engiadina. Singuls lufs hai gia dà pli baud, ma betg entirs trieps. Ils guardiaselvaschina observan per il mument intensivamain ils lufs per eruir quants, tgenins e nua che quels èn per gidar ils purs a minimar ils donns tant sco pussibel.
Purs anc senza mesiras da protecziun
Blers purs fan pensiers per lur muaglia. Plirs d’els n'èn anc betg sa preparads sin questa situaziun speziala e n'han anc betg guardà per mesiras da protecziun, sco per exempel per chauns da protecziun. Ils purs da nursas da Ftan pondereschan da cumprar u prender a fit in u plirs chauns da protecziun.
