Tip 1: Midar ad ina cassa da malsauns pli favuraivla
Ina cassa da malsauns favuraivla chatt'ins il meglier tar il calculatur da premias online da la confederaziun. Quel è liber da reclama ed independent. I vegn però recumandà da betg midar a moda tschorva a la cassa la pli favuraivla, cunzunt sch'igl è impurtant ad ins d'avair in servetsch da clientella bain cuntanschibel e da survegnir restituì a moda speditiva quints dal medi.
Tar retschertgas da cuntentientscha da clients sa plazzeschan las uschenumnadas cassas bunmartgadas dapi onns sin las ultimas plazzas. Tar talas poi ir fin 30 dis fin ch'in quint dal medi vegn pajà enavos. Usità è ch'in quint vegn liquidà aifer 10 dis.
Tip 2: Augmentar la franschisa
Da princip rendan be la pli auta franschisa da 2’500 francs e la pli bassa da 300 francs. Las franschisas amez na rendan betg, damai ch'il rabat è memia pitschen. Per ils uffants è recumandà d’eleger la franschisa la pli bassa, perquai ch'els han dad ir savens tar il medi. Tar la franschisa la pli auta survegn'ins passa 100 francs rabat sin la premia mensila. Per far quai ston ins però er esser abel da pajar ils 2'500 francs plus la participaziun als custs da 700 francs. Quai vala be la paina per persunas ch'èn saunas e sch'ils custs da sanadad per onn èn pli bass che 2'000 francs.
Tip 3: Eleger models da spargn
Tgi che na less betg auzar la franschisa po eleger in model da spargn tar la cassa da malsauns. Tar il model da medi da chasa ston ins en cas da problems da sanadad adina sa drizzar sco emprim al medi da chasa. L'elecziun libra dal medi è cunquai restrenschida. L'uschenumnà model da telmed funcziuna sumegliant. Qua han ins adina l'emprim da telefonar ad ina hotline medicinala, avant ch'ins po ir tar in medi. Las premias tar tut ils models da spargn èn circa 20% pli bassas.
Tip 4: Excluder l'accident
Tgi che lavura dapli che otg uras per emna è assicurà automaticamain cunter accidents sur il patrun. Perquai na dovran ils emploiads pertutgads nagina assicuranza cunter accidents tar la cassa da malsauns. Auter èsi tar scolaras e scolars e studentas e students: Els ed ellas ston esser assicuradas cunter accidents en il rom da l'assicuranza da malsauns obligatorica.
Premias s'augmentan era quest onn
En il Grischun creschan las premias en media per 6,6%. Quai èn mintga mais radund 20 francs dapli. En media paja mintga Grischun e mintga Grischuna a partir da l'onn 2025, 332,6 francs il mais. (2024: 312 francs il mais).
| Premia mensila 2024 | Premia mensila 2025 | Midada | |
| Creschids (sur 26 onns) | 362,5 francs | 384,9 francs | + 6,2 % |
| Creschids giuvens (19-25 onns) | 247,6 francs | 266,7 francs | + 7,7 % |
| Uffants (0-18 onns) | 98,1 francs | 103,7 francs | + 5,7 % |
Vesì sur l'entira Svizra s'augmentan las premias per 6,0% da 357,1 francs sin 378,7 francs. Ils pretschs vegnan definids uschia ch'els cumpiglian tut ils custs ch'ins po spetgar da mintga persuna sin basa da nua ch'ella viva.
Las premias suondian als custs, scriva la Confederaziun en ina communicaziun. La chareschia augmentia adina pli ferm ils custs, e quai sa mussia er en las premias. En tut ils secturs, pia en la tgira ambulanta, en praticas ed ospitals, la tgira staziunara, medicaments e chasas da tgira sajan ils custs creschids. Ils custs s'augmentan d'ina vart pervia da novas purschidas e medicaments. Da l'autra vart crescha era la dumonda.
Links nizzaivels
Er ils proxims onns stoppian ins quintar ch'ils custs s’augmentian. Per tegnair en il rom quests augments, saja dentant necessari da sbassar ils custs per il sistem da sanadad. In pachet da mesiras ha il parlament gia approvà. El vegn realisà dapi quest onn. In segund pachet da mesiras tracta il parlament actualmain.
