Bleras famiglias u persunas han il dretg d'ina reducziun individuala da las premias da la cassa da malsauns obligatorica. Las premissas per il dretg e l'autezza da la favurisaziun regla il dretg chantunal.
Las premias da las cassas da malsauns s’augmentan – ina giada dapli
Quai munta ch’ils custs creschan per in e scadin. Cunzunt famiglias cun plirs uffants sentan quai en lur bursa. Sco il manader dal post da cussegliaziun da debits da la Crusch cotschna Placi Degonda di, èn ils custs per la cassa da malsauns in dals pli gronds posts da custs.
Ina pussaivladad da reducir quels custs saja da dumandar per ina reducziun da la premia – quai pon ins far tar la l'Assicuranza sociala grischuna (SVA). Per pudair profitar da la reducziun èsi necessari d'emplenir ora la decleranza da taglia. Uschiglio na saja quai betg pussaivel da pudair profitar da la reducziun. Far diever da reducziuns da premias na pon dentant betg be famiglias ch'èn en las stretgas cun ils daners.
Era famiglias cun buna entrada survegnan ina reducziun da premias
Quant gronda che la reducziun saja, dependia da las entradas. Pli pitschnas che quellas sajan e pli gronda che la reducziun daventia. Tenor Placi Degonda saja quest model bun, ed il chantun Grischun saja fitg generus en cumparegliaziun cun auters chantuns. In problem saja dentant che blers ch'avessan la pussaivladad da far diever d’ina tala reducziun, na nizzegian betg ella.
Per la reducziun da premias per l'onn current pon ins s'annunziar da l'entschatta favrer enfin la fin da december. Ins na sto betg adina s'annunziar da nov. Sch'ins ha per exempel quest onn il dretg sin sustegn finanzial, surprenda la SVA per gronda part l'annunzia gist per l'onn proxim. Quai di Marianne Räss ch'è responsabla per la reducziun da premias tar la SVA. Perquai che las premias da las cassas da malsauns creschan l'onn proxim per 8.3% quinta ella cun dapli persunas che fan la dumonda per sustegn finanzial.
In grond sbagl saja da simplamain betg pajar ils quints
Tar Placi Degonda sin il post per cussegliaziun da debits vegnan persunas che n’èn betg uschè bainstantas, ed han bregias da dar dumogn finanzialmain. E savens saja in dals emprims posts da spargnar la cassa da malsauns. La glieud na paja lura simplamain betg quels quints – e quai saja in grond sbagl. Sch’ins na paja betg quests quints, lura n’hajan ins numnadamain er betg il dretg da survegnir ina reducziun da premias ed ils debits creschan.
Placi Degonda fa perquai l'appel a tuttas e tuts da sclerir sch’ins ha il dretg sin ina reducziun da premias. La finala na saja nagin permalà d'avair la fin dal mais in pèr francs dapli en sia bursa.
