Las autoritads tessinaisas han annunzà il mardi, 1000 novas infecziuns, la mesemna gia 1500. Cumpareglià cun l'emna passada è la media da set dis sa dublegiada. La derasaziun rasanta dad omicron n'haja anc betg in effect considerabel sin ils ospitals, i smanatschia però blers cas da quarantina, uschia las autoritads. Quai pudessia influenzar il funcziunar da l'economia tessinaisa e dal sectur public.
Silvester avant las portas
La regenza tessinaisa appellescha a la populaziun ed a las vischnancas da dar giu occurrenzas en vista a Silvester e Bumaun. Impurtant saja uss da puspè reducir contacts sin il minimum e sa tegnair vid las mesiras da protecziun. En pli appellescha il chantun a la populaziun da sa laschar testar sin corona, strusch ch'ins haja sintoms.
Per pussibilitar dapli tests ha la regenza gia decis da prolungar il temp d'avertura tar ils centers da test. A Faido e Mendrisio èn vegnids averts ulteriurs centers. En general veglia ella rinforzar ed engrondir la purschida da test.
Il chantun Vallais prenda ulteriuras mesiras
Il chantun Vallais limitescha inscunters spontans per la notg da Silvester. En il spazi public dastgan uschia be anc sa rimnar 15 persunas. La mesira valia dals 31 da december la saira da las 18:00, fin il prim da schaner la damaun a las 06:00, communitgescha il chantun.
Questa mesira saja necessaria en vista a la situaziun da corona actuala ed al privel ch'ils ospitals vegnan surchargiads.
