Pervi dal dumber da cas da corona che crescha scumonda il chantun enfin ils 10 da schaner visitas en ospitals. Il svilup actual saja preoccupant, scriva il departament da sanadad tessinais. Era visitas en chasas d’attempads daventan pli grevas. Là vala a partir da glindesdi la regla 2G+. En chasas d’attempads po damai be anc ir tgi ch’è vaccinà u guarì e, ultra da quai, po preschentar in test da corona negativ.
Augment dals cas preoccupant
Ils ultims dis èn ils cas en il Tessin creschids rasant. En cumparegliaziun cun l'emna avant dumbra il chantun in'augment da 65%. Ord quest motiv saja il contact tracing als cunfins. Sulettamain ils cas positivs vegnan anc contactads via telefonin. Quellas persunas stoppian alura infurmar sezzas lur contacts.
Er en l'Italia creschan ils cas
Sche l'augment en il Tessin ha er da far cun l'augment en l'Italia n'è betg enconuschent. En mintga cas creschan er là ils cas a moda rasanta - cun 45'000 infecziuns novas ha l'Italia annunzià la gievgia in nov record. Il minister da sanadad, Roberto Speranza, ha perquai annunzià in'obligatori da mascrinas er en il liber en l'entir pajais.
Ultra da quai, èsi ussa obligatoric da purtar en il traffic public, il kino, u en il stadion da ballape ina mascrina da FFP2. Enfin la fin da schaner, èn festas e concerts en il liber scumandads en l’Italia - era las discotecas ston serrar.
Dapli fatgs, infurmaziuns ed istorgias chattais qua .
