La Baselgia catolic-romana da la Svizra stgaffescha in’atgna dretgira penala pervi dals cas d’abus. Quai ha l’uvestg Felix Gmür confermà. A partir da l'onn 2024 duai la dretgira da la Baselgia naziunala surpigliar cas, suenter che dretgiras statalas han sentenzià. La nova dretgira po per exempel relaschar spirituals da lur uffizi.
Sch'i dat cas d’abus tar ina dretgira statala, lura duai la dretgira ecclesiastica surpigliar per exempel da decider davart in'exclusiun ord in urden. Questa dretgira duai consister da persunas dal fatg ch’èn versadas en il dretg ecclesiastic. Quellas persunas na ston betg exnum esser da cretta romana-catolica.
Uschia ha il parlament da baselgia vulì far agir suenter il studi preliminar ch'è vegnì publitgà il settember tar cas d'abus. «Nus vegnin a discutar quai e chattar ina buna via», ha Gmür ditg.
L’emna passada ha il papa dà la lubientscha als uvestgs da la Svizra per introducir uschia ina dretgira.