La claustra da Saint-Maurice en il Vallais è confruntada cun in'ulteriura renfatscha d'abus sexual. Questa giada vai per l'avat ad interim da la claustra tenor in rapport da la televisiun da la Svizra franzosa. Il chapitel claustral sa raduna mardi e prenda lura posiziun la mesemna.
Il scolast da grec e latin al gimnasi n'instrueschia betg pli, fin ch'ils fatgs sajan sclerids, annunzia il chantun che maina il gimnasi. L'um uss inculpà aveva surpiglià il settember la direcziun da la claustra Saint-Maurice suenter che l'avat era sa retratg ad interim, pervi d'in auter cas d'abus. Cunter lez investighescha l'investigader spezial apostolic Joseph Bonnemain. La claustra da Saint-Maurice na suttastat betg a la diocesa da Sitten, mabain directamain al Vatican.
«Nus prendain serius questas revelaziuns e sentin empatia per las unfrendas», ha ditg il schef dal servetsch d'instrucziun vallesan, Jean-Philippe Lonfat, glindesdi envers l'agentura da novitads Keystone-SDA. Tant sco el sappia na sajan ils malfatgs che vegnan rinfatschads a l'um da la baselgia betg colliads cun il collegi, ha ditg Lonfat vinavant. Tenor RTS duai l'avat ad interim avair violà in noviz.
Pli baud era la gronda part dal persunal d’instrucziun spirituals. Oz datti dals 100 scolasts be pli trais canonis ch’instrueschan. Tranter quels èn il rectur actual e l’avat ad interim inculpà.
Nov cas en la Saint-Maurice
Tenor in rapport da l'emissiun da RTS «Mise au Point» ch'è vegnì publitgà dumengia saira, duain 9 spirituals esser involvids en cas d'abus sexual entaifer la claustra da Saint-Maurice. Ils blers cas ch'èn vegnids tractads en l'emissiun èn succedids ils onns 1995 fin 2005.
Ils schurnalists èn sa basads sin documents da dretgira sco er sin indicaziuns da perditgas d'unfrendas ed intervistas cun anteriurs emploiads da l'instituziun.
