En Svizra creschan ils pretschs per abitaziuns e chasas vinavant. Malgrà la midada da tschains tar la Banca Naziunala na saja anc betg da constatar ina midada da trend, sco quai che l'index da Swiss Real Estate mussa. Tenor quel han ils vendiders d'abitaziuns da proprietad anc ina giada auzà cleramain lur spetga da pretschs – quai per passa 1%. Tar las chasas è quella in zic pli bass cun 0,3%. Damain moviment datti percunter tar ils tschains per abitaziuns. Ils pretschs en ils inserats n'èn strusch sa muventads il zercladur, cun in plus da 0,1%.
Er tschains ipotecars s'augmentan
Pervi da la midada da tschains da la Banca Naziunala creschan era ils tschains ipotecars. Entras quai possia l'interess per investiziuns en immobiglias sa reducir. Fin uss na saja quai dentant betg il cas, scriva la Swiss Marketplace Group ensemen cun la firma da cussegliaziun d'immobiglias IAZI.
Sche quai ha in'influenza sin la prontadad da pajar da la glieud, na saja anc betg cler. Tenor l'index da Swiss Real Estate na sajan ils tschains ipotecars betg il sulet criteri sch'i va per cumprar possess d'abitar. Ina pli grond'influenza ch'ils tschains, dettia da spetgar tar ils auts pretschs d'energia. Surtut tar edifizis vegls stoppian ins quintar cun in augment dals custs.