Avant paucs dis ha la Banca naziunala svizra augmentà per l’emprima giada dapi 15 onns il tschains directiv per far frunt a l’inflaziun. Quai sentan er ferm ils proprietaris da chasa: Ils tschains per ipotecas a tschains fix a pli lunga vista èn s’augmentads sin sur 3%. Er quellas pli curtas èn actualmain tar 1,8%. Quai saja dentant pir l’entschatta da la midada da tschains, ha ditg Donato Scgnamiglio, schef da la firma da cussegliaziun per immobiglias «latzi» envers la Sonntagszeitung.
Tenor il president da la banca naziunala, Thomas Jordan, pudessi gia dar il settember in ulteriur augment dal tschains directiv. Uschia pudessan ils tschains a curta vista crescher sin 3%. En consequenza vegnian 20% dals possessurs e da las possessuras da chasa a violar las reglas da supportabladad da las bancas. Tgi che na possia lura betg pli pajar il tschains, perdia en il mender cas sia chasa, uschia il schef da «lazi».
Il medem mument stoppian ils proprietaris quintar che lur immobiglia perdia ferm valita. Gia avant la decisiun da la banca naziunala d’augmentar il tschains directiv, sajan ils pretschs per chasas da proprietad sa reducids, surtut en citads pitschnas ed en la champagna.