En Svizra pudessi bainprest dar memia paucas abitaziuns. Da quest scenari avertescha in studi da la Banca Raiffeisen Svizra. Uschia vegnian en Svizra damain abitaziuns construidas, fertant che la dumonda per spazi da viver creschia. La populaziun vegnia adina pli veglia e vivia adina pli savens persula ed en abitaziuns pli pitschnas. Tenor la Raiffeisen hai l’onn passà dà dapli novs perchasas che quai che novas abitaziuns sajan vegnidas construidas. L’ultima giada saja quai stà il cas avant passa in decenni.
Blers onns haja la dumonda suenter abitaziuns affittadas betg pudì tegnair pass cun la purschida. Tschains istoricamain bass dals onns passà han dà bler chapital per il martgà d'abitaziuns affitadas. La consequenza eran pli blers alloschis vacants e fit-chasa inizialas che s'han reducì continuadamain.
Dumonda creschia era pervia da la guerra en l'Ucraina
Dapi l'entschatta da la guerra sajan sur 48'000 persunas ord l'Ucraina fugì en Svizra. Ils fugitivs ch'eran fin uss en alloschis collectivs u en chasadas privatas, pudessan bainprest tschertgar in'abitaziun sin moda regulara. Uschia pudess la guerra a vista mesauna er avair in effect sin il martgà d'abitaziuns.
