La posta ha ils emprims nov mais da quest onn fatg in gudogn da 145 milliuns francs. Quai èn 142 milliuns francs pli pauc che l'onn passà. La raschun per questa sminuziun saja la luna nauscha da las consumentas e consuments e la chareschia.
Dentant era la digitalisaziun haja giugà ina rolla, ha communitgà la posta. Fin la fin da settember ha ella fatg in resultat da gestiun da 208 milliuns francs (-137 milliuns francs).
6,6 pertschient damain brevs e 5,1 pertschient damain pachets
En la fatschenta da logistica ha il resultat da gestiun muntà a 201 milliuns francs (-77 milliuns francs). Tar tuttas gruppas da product essenzialas saja la dumonda ida enavos. Tar las brevs hai dà in minus da 6,6 pertschient, tar la distribuziun da reclamas senza adressa tar 8,5 pertschient e tar ils pachets tar 5,1 pertschient.
La sminuziun da la quantitad tar las brevs e tar ils pachets hajan ins er sentì tar ils spurtegls da la rait da posta. Damai ch’ils pajaments al spurtegl sajan sa reducids en il medem mument per 19,6 pertschient, saja il resultat da la rait da postas sa sminuì per 16 milliuns francs.
Postfinance senta midada dal tschains
Tenor atgnas indicaziuns ha Postfinance sentì l’influenza da la midada da tschains ed ha fatg in gudogn da gestiun pli bass. Dal schaner fin il settember 2023 ha l’interpresa fatg in gudogn da gestiun da 200 milliuns francs (onn precedent 218 milliuns francs).
Per l’entir onn 2023 quinta La Posta cun in resultat sut quel da l’onn precedent. A partir da l’onn proxim duai ultra dal svilup dals tschains er la realisaziun consequenta da la strategia «Posta da damaun» influenzar a moda positiva il resultat. La strategia «Posta da damaun» sa basa sin las quatter pitgas svilup, creschament, effizienza e pretschs sco er responsabladad d’interpresa.
