- Per il prim da zercladur 2024 prevesa la Direct Mail Company da chalar ses servetsch da distribuziun, scriva la Posta.
- Passa 3'900 persunas che repartan reclama u che lavuran en l'administraziun perdan lur lavur.
- La Posta integrescha quest servetsch da la Direct Mail Company en ses servetsch ordinari.
I dettia adina pli paucas gasettas gratuitas e reclama da reparter, pervi da la digitalisaziun – scriva La Posta en ina communicaziun. Ils davos 10 onns saja il quantum sa reducì per in terz. Influenzà quai hajan era ils tatgaders «Stop reclama» e la perdita da pliras grondas incumbensas.
Perquai prevesa la Direct Mail Company, ina filiala da La Posta, da chalar per il 1. da zercladur 2024 cun il servetsch da distribuziun. Quai cun resalva d'ina procedura da consultaziun che cumenza la mesemna. Tras questa decisiun van 422 plazzas cumplainas a perder. Pertutgadas fissan radund 3'855 persunas che repartan reclama, cun pensums tranter 3 ed 8 uras l'emna. Vitiers perdissan 72 collavuraturas e collavuraturs, cun pensums tranter 70 e 100%, che lavuran en la sedia principala a Basilea, lur lavur.
Enstagl da repartar la reclama e las gasettas gratuitas cun la glieud da la Direct Mail Company, prevesa La Posta che ses agen servetsch da distribuziun surpiglia quest pensum. Perquai vul l'interpresa adattar si'organisaziun, sco ella scriva.
Il schef da La Posta Christophe Levrat en in discurs tar SRF, la stad 2023:
