La Posta ha fatg dapli gudogn e dapli svieuta l'emprim quartal da quest onn. Il gudogn è creschì per 68 milliuns sin 159 milliuns francs. La svieuta per 58 milliuns sin 1,7 milliardas francs. Quai cumpareglià cun il medem temp da l'onn avant, uschia communitgescha la Posta.
Contribuì a quest resultat ha surtut la PostFinance. Il martgà da brevs va però vinavant enavos ed er quel da pachets è sa reducì per prest 10% cumpareglià cun il 2021, cura che l'effect dal lockdown aveva quasi laschà explodir il martgà online.
Pli paucs pachets che l'onn avant
La Posta senta che la glieud va puspè dapli en stizun ed ha elavurà 47,2 milliuns pachets, quai èn 9,6% pli pauc ch'il medem quartal durant il lockdown. Ultra da quai èn era las stretgas en l'Asia, che sa resultan da la guerra en l'Ucraina, ina raschun per la schleta luna dals consuments online. Las brevs han cun 471,8 milliuns brevs gì in diminuziun da 1,8%.
