Ils autos da posta en Svizra han transportà passa 135 milliuns passagiers il 2021. Quai ha communitgà AutoDaPosta. Quai saja bain in augment legraivel, dentant las diversas restricziuns da la vita publica hajan anc adina gì in’influenza sin il resultat. Ed uschia saja il record d’enfin qua dal 2019 anc lunsch davent. Lura aveva AutoDaPosta transportà 167 milliuns passagiers.
Cifras impressiunantas
En tut han il 2’370 autos da posta en servetsch fatg il 2021 132 milliuns kilometers. Per cumparegliaziun, il sulegl è var 150 milliuns kilometers davent dal mund.
Sin 993 lingias hajan ils autos servì 11’500 fermadas. La fin dal 2021 ha l’interpresa AutoDaPosta dumbrà 3’023 collavuraturas e collavuraturs.