La Posta svizra ha fatg l'onn 2021 in gudogn da passa 457 milliuns francs. Quai è bunamain 280 milliuns dapli che l'onn avant (178 milliuns). Uschia saja ella sa revegnida pli svelt che spetgà da las consequenzas finanzialas da la pandemia, scriva la Posta. Uschia hajan ins pudì mitigiar las consequenzas negativas durant il segund onn da la pandemia.
Bleras sfidas era suenter la pandemia
Tuttina restan bleras sfidas en la situaziun economica actuala. La Posta ha da sbatter cun ils tschains negativs tar la Postifinance, la regressiun dals affars en daner blut, la diminuziun en la quantitad da brevs e l'augment tar la quantitad da pachets. La creschientscha en il segment dals pachets na possia però betg cumpensar la perdita tar il segment da brevs.
