Las novitads dals 20-12-2024 - Scola a Rabius duai vegnir sanada

• La chasa da scola da Rabius duai vegnir sanada per 3,7 milliuns francs. Quai ha decis cleramain la radunanza communala da Sumvitg la gievgia saira. Uss dovri anc la decisiun a l’urna, quella è previsa ils 9 da favrer 2025. Il bajetg da la scola a Rabius stat dapi passa 60 onns. E vitiers han ins constatà ina memia auta concentraziun da radon en pliras stanzas da scola.

• En Svizra na duai betg pli sa repeter ch’ina banca relevanta per il sistem sto vegnir salvada. Quai pretenda la cumissiun parlamentara d’inquisiziun PUK en vista al collaps da la banca gronda Credit Suisse. La cumissiun pretenda mesiras legalas, ma er areguard la collavuraziun da las autoritads. Responsabel per la crisa saja stà il management da la CS. Cun lur intervenziun hajan las autoritads impedì ina crisa da finanzas globala. Da far diever dal dretg d’urgenza tar l’acziun da salvament saja stà confurm al dretg.

• La Svizra e l'Uniun europeica han terminà las contractivas davart las relaziuns futuras tranter la Confederaziun e l'UE. Las finamiras dal Cussegl federal tar las tractativas sajan vegnidas cuntanschidas, ha ditg la presidenta da la Confederaziun Viola Amherd. Ussa vegnian las debattas politicas en Svizra lantschadas ed i saja l'incumbensa dal parlament e da la populaziuns da surpigliar il timun. Per Ursula von der Leyen ha la cunvegna ina dimensiun istorica. Entras quella sajan ils interess da la Svizra e da l'UE resguardads medemamain.

• Talina Gantenbein segunda ad Innichen. Pli svelta che l’Engiadinaisa è sulettamain stada la Tudestga Daniela Maier. Quai è il meglier resultat insumma che Talina Gantenbein ha cuntanschì en ina cursa da la cuppa mundiala dal skicross. La segunda svizra a la partenza, Natalie Schär, sa classescha sin rang 7.

Il di en survista