La radunanza communala da Sumvitg ha concedì il credit da 3,75 milliuns francs per la sanaziun da la chasa da scola a Rabius. Vegnida urgenta è la sanaziun suenter che pliras mesiraziuns ils onns 2021 e 2022 han mussà che la concentraziun da radon è memia auta en pliras stanzas da scola. Sinaquai ha l’uffizi responsabel ordinà ina sanaziun da radon per la scola. Suenter avair examinà pliras variantas ha la suprastanza communala da Sumvitg fatg la proposta da sanar l’entir bajetg energeticamain ed era las installaziuns sanitaras, uschia è vegnida orientada la radunanza communala. Las 65 persunas preschentas n’han betg crititgà la sanaziun sco tala dal bajetg – e perquai han 59 persunas sustegnì la proposta da la suprastanza.
Nov stgaudament e fotovoltaica sin tetg
Dasper l’entira sanaziun da radon ch’è budgetada cun ina summa da 65’000 francs, vegn era il stgaudament ch’è vegnì en ils onns remplazzà cun in da geotermia. Era vegnan las installaziuns sanitaras en il bajetg, ch’èn medemamain 60 onns veglias, modernisadas ed adattadas als basegns actuals e futurs da la scola a Rabius. Ils dus tetgs, tant dal bajetg da la scola sco era da la halla da gimnastica vegnan sanads total – e sin la part da la scola vegnan installads panels per la producziun d’energia solara. Là nua che quai na vegn betg montà solar, vegn gia fatg las installaziuns ch’ins pudessi alura anc montar supplementar panels solars. Quai ha declerà il president communal Patrick Schaniel sin ina dumonda or dal public. Ina raschun daco che quai na vegn betg fatg èn ils custs supplementars e la situaziun actuala co spisgentar l’energia en la rait, uschia il president. Era las fatschadas da la chasa da scola vegnan sanadas, quellas da la halla da gimnastica betg, era qua ord motivs finanzials. Uschia restan ils custs totals budgetads tar 3,7 milliuns francs. L’ultim pled ha la populaziun da Sumvitg ils 9 da favrer a l’urna.
Sche la populaziun da Sumvitg approvescha il credit il favrer a l’urna, alura vegnan las lavurs a cumenzar la stad 2025. Quellas vegnan fatgas parallel cun il manaschi da scola ed ellas vegnan a durar probabel dus onns.
Dumber da scolaras stabil
La dumonda sche quai fa senn da sanar in bajetg da scola sch’il dumber da scolaras e scolars sa sminuescha è vegnida respundida a l’entschatta dal president communal. Per Patrick Schaniel n’èsi betg imaginabel che la vischnanca da Sumvitg n’avess betg ina chasa da scola, surtut perquai ch’ella aveva anc avant paucs onns tschintg chasas da scola. Perquai è la sanaziun dals bajetgs existents da gronda impurtanza per la vischnanca ed in signal positiv per l’avegnir, ha declerà Patrick Schaniel. Il mument frequentan ils uffants da la vischnanca da Sumvitg a partir da la scoletta fin a la sisavla classa primara lur scolaziun a Rabius. Quai èn il mument radund 60 uffants ed era per ils proxims tschintg onns resta quai dumber constant.
La vischnanca da Sumvitg ha dapi plirs onns in consorzi da scola cun la vischnanca vischina da Trun. A Trun èn las localitads vegnidas modernisadas e per part construidas da nov avant paucs onns. Ils uffants dal stgalim superiur frequentan lur temp da scola a Trun.
