Tut en tut vegnan passa 2'700 represchentantas e represchentants da 130 pajais al WEF che cumenza l'auter glindesdi e dura fin il venderdi, sco ils organisaturs dal WEF han ditg mardi ad ina conferenza da medias.
Da la partida èn tranter auter er il chancelier tudestg Olaf Scholz, la presidenta da la cumissiun da l'UE Ursula Von der Leyen u er il president da la Pologna Andrzej Duda e la scheffa da la banca centrala europeica Christine Lagarde. La Svizra vegn tranter auter represchentada dal president da la Confederaziun, Alain Berset.
La Frantscha, la Gronda Britannia ed ils Stadis Unids na tramettan fitg probabel nagins schefs da stadi u da regenza en il Grischun. Uschia er betg la Russia e la China.
Vischnanca ha dà lubientscha per demos
La vischnanca da Tavau ha lubì tut en tut sis demonstraziuns durant il Forum mundial d’economia. Quai ha la chanzlia communala confermà envers RTR.
Las duas grondas demonstraziuns – cun maximal 300 participantas e participants – èn gia la dumengia. Lura s’inscuntran demonstrantas e demonstrants cun ils Giuvens socialists per ina viagiada d’enviern per l’egualitad dal clima. I sa tracta d’ina viagiada da Claustra enfin a Tavau. Sin la plazza da la posta suonda ina demonstarziun sin il plaz.
Durant l’emna suondan ulteriuras demonstraziuns en in rom pli pitschen.
