Il president dals Stadis Unids, Joe Biden na fa quest onn betg part dal Forum mundial d’economia a Tavau. Er betg la vicepresidenta Kamala Harris u il minister da l’exteriur Antony Blinken. Quai ha communitgà l’ambassada americana a Berna. Persuenter tramettia il pajais ina delegaziun cun l’incumbensà spezial dal president per il clima, John Kerry, il minister da lavur Martin J. Walsh ed il directur dal FBI Christopher Wray.
Il WEF ha lieu dals 16 fin ils 20 da schaner. Spetgads vegnan radund 3'000 participantas e participants internaziunals da l’economia, la politica, la scienza e la societad. La glista dals giasts uffiziala n’è anc betg enconuschenta, annunziads èn tranter auter la presidenta da la cummissiun da l'UE, Ursula von der Leyen ed il chancelier tudestg Olaf Scholz. Il WEF è quest onn sut il motto «Collavuraziun en in mund fragmentà».
