Per exempel vegn ina ustaria a la promenada da Tavau nizzegiada sco basa d'ina firma d'informatica. En general sa chasan a la promenada, sco gia ils onns avant, cunzunt firmas d'informatica ed organisaziuns da turissem da l’exteriur lontan. Quai di Marcus Felber, inspectur da construcziun da Tavau, envers il schurnal regiunal da SRF.
Dapi 4 onns in nov sistem d’organisaziun
Avant tschintg onns hai pervia da quest travasch supplementar, dà in caos sin las vias ed in collaps dal traffic. Uschia ha la vischnanca reagì e dapi lura datti ina procedura da permissiun en dus pass:
- Sin il pli tard enfin la fin da settember ston quels uschè numnads «segunds acturs», trametter lur dumondas cun ils plans.
- Per ch'i giaja d'eriger tut senza incaps, ston las fatschentas vinavant trametter enfin la fin d'october in concept da gestiun.
Uss avain nus la survista, cura che tgi bajegia si tge nua. Uschia savain nus era nizzegiar sinergias, che per exempel dus plazzals dovran la medem tschaghegna.
Quellas massas da dumondas dattan blera lavur a la vischnanca. A partir dal mument che las dumondas èn sin maisa, elavuran e controlleschan trais persunas las dumondas. Quest onn èn 130 da las 150 dumondas vegnidas approvadas. Dentant n'èn betg tut las 20 dumondas vegnidas refusadas, intginas fatschentas hajan simplamain puspè tratg enavos la dumonda, di Maurus Felber.
Uschè ditg ch'ina dumonda sa tegn vid la lescha da bajegiar e vegn tramessa ad uras, datti quasi nagina raschun da refusar ina dumonda.
En tut custian las lavurs enturn il WEF radund in mez milliun francs a la vischnanca da Tavau. Pajà vegnia quai da quels «segunds acturs» tras taxas. Quai cumenza cun ina taxa per permissiuns, sur ina per pender si placats, enfin tar ina per il traffic e la logistica, di Maurus Felber, envers il schurnal regiunal da SRF.
