Las proximas fin d'emnas èsi puspè da quintar cun dapli traffic sin l'autostrada A13. Surtut enturn il tunnel Isla Bella èsi da quintar cun colonnas. Perquai vul il chantun puspè cuntinuar cun las mesiras per las vias da guntgida. Quai ha communitgà l’Uffizi da construcziun bassa. Dentant quinta il chantun cun pli pauc traffic che durant Pasca, Ascensiun u Tschuncaisma.
Mesiras per la stad
Tschertas vias tras singuls vitgs per lung da l’autostrada A13 duain vegnir serradas durant la stad per il traffic da transit. Quai vala en direcziun sid per la fin d'emna dals 16 da fanadur e quella dals 29 da fanadur. En direcziun nord quellas dals 6 ed ils 13 d’avust. Uschia vul il chantun reprender las mesiras dal project da pilot ch’el ha instradà per far frunt ad il traffic da vacanzas durant ils firads da primavaira. L’effect da las mesiras vegnia persequità ed analisà intensivamain. Ils resultats vegnian ad esser avant maun la segunda mesadad da settember.
