Il pli ferm èn stadas pertutgadas las vias da Maiavilla sur Landquart enfin a Cuira. Malgrà ch'i n'ha dà nagins accidents pli gronds èn las vias stadas stuppadas – tant l'autostrada sco er las vias principalas. Il pledader da la Polizia chantunala, Roman Rüegg discurra d'ina situaziun da traffic extraordinaria.
Vias talmain surchargiadas senza avair gì accidents, n'hai jau enfin uss anc betg vis.
Traffic da return il glindesdi percunter hai gì pli pauc ed uschia n'hai er betg dà pli gronds problems. Che las vias èn stadas il glindesdi pli libras haja tranter auter da far cun il fatg che betg tuts sajan turnads da la fin d'emna prolungada il medem mument.
A13: Resultats dal project da pilot dovran anc pazienza
Sur ils dis da Tschuncaisma è la via principala tras Panaduz e Razén puspè vegnida serrada e tgi ch'è ì vers sid ha stuì restar sin l'autostrada. Tenor la Polizia chantunala dal Grischun, hajan automobilistas ed automobilists dentant empruvà da sviar sur ils vitgs per mitschar las colonnas. Persunal che reglava il traffic haja dentant tramess davent quels.
Grazia al persunal da segirtad n'èn las automobilistas ed ils automobilists betg charradas tras Razén e Panaduz.
Sur ils dis enturn il firà d'Ascensiun n'aveva quai betg funcziunà optimal da serrar las vias principalas per il traffic da transit:
Da Pasca perencunter era la populaziun dals vitgs sa mussada fitg cuntenta senza traffic da transit:
Da quest pilot sur tut ils dis da festa fa la polizia chantunala anc bilantscha. Vischnancas sco Domat che n'èn betg part dal project da pilot speran, ch'els pon bainprest era far diever da las medemas mesiras cunter il traffic sco Razén e Panaduz.