La regenza grischuna duai far tut il pussaivel per optimar la situaziun da traffic sin ed enturn l’autostrada A13. Il Cussegl grond ha surdà unanimamain in’incumbensa dal deputà liberal Thomas Bigliel (PLD). El propona differentas mesiras, sco per exempel da restrenscher il traffic tras ils vitgs per tut las vischnancas perlung l’A13 ubain er da procurar ch’apparats da navigaziun na proponan betg als automobilists da bandunar l’autostrada.
La regenza grischuna è pronta da pigliar a mauns quest problem – in emprim project da pilot ha gia gì lieu sur ils dis da Pasca e Tschuncaisma cun serrar las vias tras Panaduz e Razén. Enfin l’onn 2024 duai esser sin maisa in concept da traffic cumplessiv. Cun Google hajan ins gia gì contact per optimar la navigaziun dal traffic.
