Il campadi dal TCS nascha
Il cussegl administrativ dal TCS ha 1936 lantschà in program per extender las activitads dal club, latiers tutgava er il campadi. Ina finamira principala era da promover il campar cun tut quai ch'appartegna. Quai pudevan er esser autos, motos, velos u era canus. Uschia ha il Touring Club Svizra fundà il prim da mars 1949 la secziun campadi – il di da naschientscha dal TCS Camping.
Cumenzà han els cun sis campadis. En ils chantuns Appenzell Dadora, Berna, Glaruna, Turitg, Vad e Vallais. Da quest temp dumbrava il club 680 commembers e commembras. Gia in onn pli tard – l'avust 1950 – dumbrava il TCS 2'177 commembers.
Sfidas e stagnaziun
In'emprima fasa da sfidas è stada en ils onns 60. Ils campadis han stuì vegnir equipads per las rulottas e betg pli mo per tendas. Vitiers èn vegnids problems da chattar persunal, u administraturs dals campadis.
La secunda fasa da sfidas è stada la fin dals onns 80. Far vacanzas sin campadis è s'etablì, popular n'èsi dentant betg pli stà. La populaziun ha plitost fatg vacanzas en pajais exotics u fatg in viadi en ina citad. La purschida da sgols bunmartgads ha sustegnì quest svilup, e la popularitad da campadis è stagnada.
A partir da l'onn 2000 ha il campar puspè gudagnà popularitad. Quai pervia dal trend dal turissem da natira – puncts sco flexibilitad ed independenza han dà in schlantsch. Il TCS ha elavurà in concept uschia ch’els èn puspè vegnids sin buna via.
Glamping – in nov trend
Il pled glamping vegn da «glamour» e «camping». Pia campar a moda luxuriusa. Confort e cumadaivladad en in albiert modern per glieud che vul far vacanzas sin il campadi, mo betg durmir en ina tenda u en ina rulotta. Il trend che vegn oriundamain da l'America è sa derasà a partir da l'onn 2015 era en l’Europa.
Sin ils campadis dal TCS datti diversas purschidas da glamping. D’ina tenda sin chommas-lain, ina rulotta antica da circus fin ina chasa mobila. Tgi che vul campar e betg cumprar equipament da campar ha uschia ina gronda schelta da pussaivladads.
Glamping – uschia vesa quai ora
-
Bild 1 von 2Legenda: Far glamping po vesair ora uschia ... Keystone
-
Bild 2 von 2Legenda: ... ubain uschia. Keystone
Il boom en la pandemia
L’onn 2020 è stà fermamain influenzà da la pandemia. Far vacanzas en il pajais steva sin il program. Questa situaziun han ils campadis pudì duvrar per lur fatschenta. Era sch'ins ha stuì spetgar nov emnas dad avrir ils campadis, han ins la fin da la stagiun cuntanschì novs records cun las pernottaziuns. Uschia han ins era prolungà la stagiun da campar.
In onn pli tard ha TCS Camping gì in ulteriur onn da record – 1 milliun pernottaziuns l'onn 2021. In dals campadis ils pli populars era quai onn il campadi a Mustér.
Camping en il Grischun
Tgi che vul campar sin in campadi dal TCS en il Grischun ha pliras pussaivladads. Total datti tschintg campadis da grondezza differenza. Dapi il 2022 datti a Flem in campadi sper il center da sport «Prau la Selva». In auter è da chattar a Mustér, gist a la riva dal Rain Anteriur. En l'Engiadina datti in campadi dal TCS a Scuol ed in a Samedan. Il campadi dal TCS il pli grond sa chatta a Tusaun.